Mumbai Court : अधिकाऱ्यांना मारहाण करणं भोवलं! भाजप आमदाराला 6 महिन्यांच्या तुरुंगवासाची शिक्षा

मुंबई : महापालिका अधिकाऱ्यांवर (Mumbai Municipal Corporation) हल्ला केल्याप्रकरणी भाजप आमदार तामिळ सेल्वन (BJP MLA Tamil Selvan) यांना मुंबई सत्र न्यायालयाने (Mumbai Sessions Court) दोषी ठरवून सहा महिन्यांची शिक्षा सुनावली आहे. विशेष न्यायाधीश आर. एन. रोकडे यांनी सोमवारी तमिळ सेल्वन यांना शिक्षा सुनावली.

सेल्वन विशेष न्यायालयाच्या निर्णयाला उच्च न्यायालयात आव्हान देणार असल्याची माहिती मिळत आहे. तामिळ सेल्वन आणि इतर चार आरोपींना फौजदारी प्रक्रिया संहितेच्या कलम ३१३ अंतर्गत न्यायालयाने दोषी ठरवले. खटल्यादरम्यान सहायक पोलिस आयुक्तांसह १३ पोलिस कर्मचाऱ्यांनी न्यायालयात साक्ष दिली होती.

मुंबई महापालिका कर्मचाऱ्यांनी २०१७ मधील महापालिका निवडणुकीपूर्वी सायन कोळीवाडा भागातील पंजाबी कॉलनीची तपासणी केली होती. त्यानंतर काही बेकायदा वीज आणि पाणीपुरवठा कनेक्शन खंडित करण्याचा निर्णय घेतला. महापालिका अधिकाऱ्यांनी पोलिसांना त्यांच्या कामात मदत करण्याची विनंती केली होती. त्यानुसार महापालिका अधिकाऱ्यांची एक टीम त्यांच्या मदतीसाठी पाठवण्यात आली होती.

जेव्हा टीम पंजाबी कॉलनीत पोहोचली तेव्हा त्यांना काम करण्यापासून रोखण्यात आले. तसेच त्यांना मारहाणही करण्यात आली. मुंबई महापालिकेच्या कारवाईविरोधात आरोपी सेल्वनने सुमारे एक हजार लोकांच्या जमावाचे नेतृत्व केले होते. पोलिसांनी अतिरिक्त फौजफाटा पाचारण केल्यानंतरच गर्दीवर नियंत्रण मिळवता आले होते.