Fire News: उत्तनमध्ये मासेमारी नौकेला आग; लाखो रुपयांचे नुकसान

Fire News: उत्तन येथील पातान बंदर येथे समुद्रकिनार्‍याजवळ नांगरुन ठेवण्यात आलेल्या मासेमारी नौकेला शुक्रवारी सकाळी भीषण आग लागली. या आगीत संपूर्ण नौका जळून खाक झाली असून मच्छिमाराचे लाखो रुपयांचे नुकसान झाले

पातान बंदर येथे समुद्रात नांगरुन ठेवण्यात आलेल्या सिरील घावट्या यांच्या राजश्री नावाच्या मासेमारी नौकेला शुक्रवारी सकाळी नऊच्या सुमारास अचानक आग लागली. याची माहिती मिळताच आसपासच्या मच्छिमारांनी तातडीने धाव घेऊन आग विझवण्याचा प्रयत्न सुरु केला. मिरा भाईंदर महनागरपालिकेचे अग्निशमन दलही घटनास्थळी दाखल झाले.

त्यांनी आगीवर नियंत्रण मिळवले. मात्र आगीत मासेमारी जाळी, नौकेच्या तांडेलची केबीन, मासळी साठविण्याचे नौकेतील शीतगृह, खलाश्यांची रहाण्याची जागा, जीपीएस व वायरलेस यंत्रणा त्याचप्रमाणे अन्नधान्य असे मिळून एकंदर तीस लाख रुपयांचे नुकसान झाले. नौकेची दुरुस्ती करण्यासाठी मोठा खर्च येणार असून त्याला बराच अवधी देखील लागणार आहे. या काळात मासेमारी पूर्णपणे ठप्प होणार आहे.

मासेमारी व्यवसायावरच कुटुंबाचा उदरनिर्वाह चालत असल्यामुळे सरकारने आर्थिक मदत करावी अशी मागणी सिरील घावट्या यांनी केली आहे. मासेमारी नौकांचे वेगवेगळ्या अपघातात मोठे नुकसान होत असते. परंतू राज्य सरकारकडून मच्छिमारांना कोणतीही नुकसान भरपाई मिळत नाही.

दुष्काळात शेतकर्‍यांना ज्याप्रमाणे मदत केली जाते त्याच प्रमाणे केवळ मासेमारी व्यवसायावरच अवलंबून असलेल्या मच्छिमारांनाही राज्य सरकरने आर्थिक मदत करणे आवश्यक आहे अशी मागणी माजी स्थानिक नगरसेविका शर्मिला बगाजी त्याचप्रमाणे मच्छिमारांचे नेते बर्नड डिमेलो यांनी केली आहे.