चोरीचा पहिलाच प्रयत्न; तोपण फसला

डोंबिवली - नशेत धुंद होत रस्त्यावरुन झिंगत चालणाऱ्या एका व्यक्तीला हेरुन त्याला धक्का बुक्की (Beating) करत दोघा चोरट्यांनी (Thief) त्याच्याकडील मोबाईल (Mobile) हिसकावून पळ काढल्याची घटना रविवारी रात्री घडली. याप्रकरणी सोमवारी गुन्हा दाखल होताच अवघ्या काही तासातच रामनगर पोलिसांनी (Police) तांत्रिक विश्लेषणाच्या आधारे दोघांना अटक (Arrested) केली आहे. सुदर्शन पटेल (वय 18) व अमित वागरे (वय 18) अशी अटक आरोपींची नावे असून त्यांचा हा चोरीचा पहिलाच प्रयत्न होता. मात्र अवघ्या काही तासातच या नवख्या चोरट्यांना अटक करण्यात पोलिसांना यश आले आहे.

डोंबिवली पूर्वेतील मढवी स्कूल परिसरात राहणारे सुदेश आमकर (वय 47) हे रविवारी रात्री ते राजाजी पथ रोडवरुन घरी जात होते. नशेत ते रस्त्याने झिंगत जात असतानाच दोघा चोरट्यांनी ते पाहीले आणि संधीचा फायदा घेत त्यांनी त्या गृहस्थांना अडवून त्यांना दमदाटी करत त्यांच्याकडील 20 हजार रुपये किंमतीचा मोबाईल चोरुन पळ काढला.

याप्रकरणी फिर्यादी यांनी सोमवारी रामनगर पोलिस ठाण्यात गुन्हा दाखल केला. गुन्हा दाखल होताच पोलिस उपनिरिक्षक संदिप शिंगटे यांनी तातडीने सुत्र हलवित परिसरातील सीसीटिव्ही चेक करत त्याआधारे चोरट्यांना अवघ्या काही तासातच डोंबिवलीतून अटक केली. आपसात संगनमत करुन त्यांनी ही चोरी केल्याचे कबुल केले असून त्यांनी चोरलेला मोबाईल पोलिसांनी हस्तगत केला आहे.

हे दोघेही चोरटे नवखे असून त्यांची ही पहिलीच चोरी होती. यापूर्वी त्यांनी किरकोळ मारामारी, दमदाटी करणे असे गुन्हे केलेले असल्याचे तपासाच उघड झाले आहे.