ऐन लग्नसराईत फुले स्वस्त 

रोहा : हळदीकुंकू कार्यक्रमांची मुदत संपताच शनिवारपासून (ता.1) फुलांचे बाजारभाव कोसळायला सुरुवात झाली. 4 दिवसांत फुले 50 टक्‍क्‍यांनी स्वस्त झाली आहेत. आवक वाढल्याने ऐन लग्नसराईत फुले स्वस्त झाल्याने ग्राहकांकडून मागणी वाढली आहे.

महत्‍वाची बातमी : खूशखबर! कशेडी घाटातील बोगद्याचे काम वेगात 

जानेवारीत मकर संक्रांत ते रथसप्तमीपर्यंत घरोघरी हळदीकुंकू साजरे झाल्याने फुलांना चांगली मागणी होती. शनिवारी (ता. 1) रथसप्तमी होताच हळदीकुंकवाच्या कार्यक्रमांची सांगता झाली. त्यामुळे फुलांची मागणी घटली. पुणे, सांगली, सातारा व कर्नाटक भागातून फुलांची आवक चांगली होत असल्याने मुंबई व पुणे बाजारात फुलांचे भाव 50 टक्‍क्‍यांनी कोसळले आहेत. 

शनिवारी घाऊक बाजारात झेंडूची फुले 40 ते 50 रुपये किलोने विकण्यात आली होती. हीच झेंडूची फुले आता 20 रुपये किलोने विकण्यात येत आहेत. शनिवारी शेवंतीची फुले 100 ते 120 रुपये प्रति किलोने विकली गेली होती; तर बुधवारी 60 रुपये प्रति किलोने विकण्यात आली. बिजलीची फुलेही शनिवारी 60 रुपये प्रति किलोने विकली गेली होती. ती बुधवारी 30 रुपये प्रति किलोने विकली जात होती.

मोठी बातमी : कमळ सोडून हर्षवर्धन पाटील बांधणार शिवबंधन?

शनिवारी 160 रुपये किलोने विकली गेलेली गुलछडीची फुले आज 100 रुपये किलोने विकली जात होती. शनिवारी मोगऱ्याचा प्रति किलोचा भाव 1 हजार 200 रुपये होता. तो बुधवारी 400 रुपयांनी कमी होऊन 800 रुपये प्रतिकिलो झाला होता. चायनीज गुलाबाच्या 20 फुलांच्या जुडीची किंमत शनिवारी 120 रुपये होती. बुधवारी ही जुडी 80 ते 100 रुपये किमतीला होती. 

पुणे, सांगली, नाशिक भागात फुलांसाठी पोषक वातावरण असल्याने उत्पादन चांगले येत आहे. बाजारात आवक वाढली आहे; तर फुलांची मागणीही घटली आहे. त्यामुळे फुलांचे भाव 30 ते 50 टक्‍क्‍यांनी घसरले आहेत. त्यामुळे किरकोळ बाजारातही फुले स्वस्त झाली आहेत. हार व गजऱ्यांच्या किमतीही घटल्या आहेत. 
- किसन जाधव, विक्रेते 

मकर संक्रांत ते रथसप्तमीपर्यंत चालणाऱ्या हळदीकुंकू कार्यक्रमामुळे फुलांना चांगली मागणी होती. मात्र शनिवारपासून मागणी घटली. त्यानंतर आवक वाढल्याने फुलांच्या किमती 30 ते 50 टक्‍क्‍यांनी घसरल्या आहेत. आवक चांगली राहिल्यास किमती स्थिर राहतील. 
- मधुकर मालुसरे, फूलविक्रेते, कोलाड