मुंबई : तब्बल सात महिन्यांनंतर रविवारी (ता. 18) मुंबईची मोनो रेल प्रवाशांच्या सेवेत दाखल होणार आहे; तर सोमवारपासून (ता. 19) वर्सोवा-अंधेरी-घाटकोपर ही मेट्रो 1 ची सेवा 50 टक्के फेऱ्यांसह सुरू करण्यात येणार आहे. यामुळे बेस्ट बस आणि खासगी वाहनांनी प्रवास करणाऱ्या मुंबईकरांना दिलासा मिळणार आहे.
एमएमआरडीएने चेंबूर-वडाळा-संत गाडगे महाराज चौक मार्गावर मोनो रेल रविवारपासून चालविण्याचे जाहीर केले आहे. मोनो रेलमध्ये सर्वांना प्रवेश असणार आहे. तत्पूर्वी शनिवारी (ता. 17) एमएमआरडीए आयुक्त आर. ए. राजीव यांनी मोनो रेल सुरू करण्यापूर्वीच्या कामाची पाहणी केली. राजीव यांनी वडाळा ते संत गाडगे महाराज चौक असा मोनो रेलने प्रवासदेखील केला. शिवाय या वेळी क्‍यूआर स्कॅनिंगची पाहणी करत कोरोना काळात प्रवास करताना प्रत्येकाने आरोग्याची काळजी घ्यावी, असे आवाहनही त्यांनी केले.
मेट्रो वनची सेवा सोमवारपासून (ता. 19) सकाळी 8.30 पासून सुरू होईल. मेट्रोमधून प्रवास करताना प्रवाशांना सरकारने जारी केलेल्या मार्गदर्शक तत्त्वांचे पालन करणे बंधनकारक असणार आहे. 65 वर्षांवरील व्यक्ती आणि 10 वर्षांखालील व्यक्तींना आवश्‍यकतेनुसार प्रवास करण्याचा सल्ला मेट्रो प्रशासनाने दिला आहे. गर्दीच्या वेळी प्रवास टाळण्याचे आवाहन करण्यात आले आहे. कोरोनाशी संबंधित लक्षणे असलेल्या व्यक्तींना प्रवासाची परवानगी दिली जाणार नाही. मेट्रोसह स्थानकांवर मास्क घालणे, प्रवेशद्वारांवर थर्मल स्क्रीनिंग करणे अनिवार्य आहे. सामाजिक अंतर पाळावे. मेट्रोमध्ये जास्त साहित्य आणि धातूच्या वस्तू घेऊन जाऊ नये. प्रवासासाठी स्मार्ट कार्ड, क्‍यूआर तिकिटे आणि मोबाईल तिकिटे वापरावीत. आरोग्य सेतूचा वापर करावा, असे आवाहन प्रशासनाने केले आहे.
सकाळी 8.30 पासून सेवेत
- मेट्रो सकाळी 8.30 ते रात्री 8.30 या वेळेत धावेल.
- मेट्रो सेवा सुरू होण्यापूर्वी 15 मिनिटे अगोदर प्रवेशद्वार खुले केले जाईल.
- मेट्रो सेवा बंद होण्यापूर्वी 15 मिनिटे अगोदर प्रवेशद्वार बंद केले जाईल.
- 200 फेऱ्या सुरू राहणार.
- गर्दीच्या वेळी दर साडेसहा मिनिटांनी; तर गर्दी नसलेल्या वेळेत दर आठ मिनिटांनी मेट्रो सेवा.
- प्रत्येक फेरीत 300 प्रवासी प्रवास करू शकतील.
- वर्सोवा ते घाटकोपर मार्गावरील प्रत्येक स्थानकावर मेट्रो थांबण्याच्या कालावधी 20 ते 40 सेकंदांनी वाढवल्याने मेट्रोत सहज आत येता येईल.
- प्लॅस्टिक टोकनऐवजी कागदाचे तिकीट देण्यात येईल.
- स्मार्ट कार्डमध्ये मार्चपूर्वी जर शिल्लक पैसे असतील, तर तिकिटासाठी त्यांचा उपयोग होईल.
---------------------------------------------------
संपादन -
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.