आमदारकी हुकली; महापौरपदही आता महिनाभरच!

मुंबई : शिवसेनेच्या बंडखोर उमेदवार तृप्ती सावंत यांच्यामुळे झालेल्या मतविभागणीचा फटका महापौर विश्‍वनाथ महाडेश्‍वर यांना बसला. परिणामी त्यांची आमदारकी हुकली. तसेच महिनाभरात कार्यकाळ संपणार असल्यामुळे त्यांना महापौरपदावरूनही पायउतार व्हावे लागणार आहे. 

वांद्रे पूर्व विधानसभा मतदारसंघातून काँग्रेसचे झिशान सिद्दिकी यांनी महापौर महाडेश्‍वर यांचा पराभव केला. बंडखोर उमेदवार तृप्ती सावंत यांच्यामुळे शिवसेनेच्या मतांचे विभाजन झाले. झिशान यांचे पिता बाबा सिद्दिकी या मतदारसंघातून 1999, 2004 आणि 2009 असे तीनवेळा निवडून आले होते. तृप्ती सावंत यांचे पती दिवंगत बाळा सावंत याच मतदारसंघातून विजयी झाले होते. मागील वेळी निवडून आलेल्या तृप्ती सावंत यांना पुन्हा उमेदवारी नाकारण्यात आल्यामुळे त्यांनी बंडखोरी केली होती. 

- पंकजा मुंडे यांच्यासमोर पाथर्डी मतदारसंघाचा पर्याय; काय आहेत राजकीय हालचाली?

या भागातील मुस्लिम मते बाळा सावंत यांना मिळत होती. या वेळी ती मते सिद्दिकी आणि तृप्ती सावंत यांच्यात विभागली गेली. त्यांना तिसऱ्या क्रमांकावर समाधान मानावे लागले आणि महाडेश्‍वर पराभूत झाले. तृप्ती सावंत यांची 'मातोश्री'ने समजूत काढली असती आणि त्यासाठी महापौरांनी पुढाकार घेतला असता, तर ते आमदार झाले असते.

- काँग्रेस-राष्ट्रवादीच्या हालचाली सुरू; दोन मोठे नेते उद्या भेटणार!

दरम्यान, निवडणूक आचारसंहिता लागू झाल्यामुळे महाडेश्‍वर यांच्या महापौरपदाला तीन महिने मुदतवाढ मिळाली होती. त्यांचा कार्यकाळ एका महिन्यानंतर संपेल. त्यामुळे त्यांना महापौरपदावरून पायउतार व्हावे लागणार आहे.

- पाच चित्रपटांना टक्कर देत 'हिरकणी'ची बॉक्स ऑफिसवर दिवाळी!