Mumbai News : कुर्ल्यात एसआरए इमारतीला भीषण आग, 39 रहिवाशांची सुटका

मुंबई - कुर्ला पश्चिमेकडील एका एसआरए योजनेतर्गत बांधण्यात आलेल्या इमारतीला शुक्रवारी मध्यरात्री भीषण आग लागली. अग्निशमन दलाच्या जवानांनी कुशलतेने इमारतीत अडकलेल्या 50 ते 60 रहिवाशांना सुखरूप बाहेर काढले आहे.

मात्र आगीच्या धुरामुळे घुसमटलेल्या 39 रहिवाशांना राजावाडी रुग्णालयात दाखल करण्यात आले असून सर्वांची प्रकृती स्थिर असल्याची माहिती मिळाली आहे. शॉर्टसर्किटमुळे ही आग लागल्याचा प्राथमिक अंदाज असून व्ही. बी. नगर पोलीस याबाबत अधिक तपास करत आहेत. चांगली बाब म्हणजे या दुर्घटनेत कोणतीही जीवितहानी झालेली नाही.

कुर्ल्यातील कोहिनूर रुग्णालय परिसरात असलेल्या डॉ भीमराव आंबेडकर आय गृहनिर्माण प्रकल्पाच्या एका इमारतीत शुक्रवारी रात्री 11.45 सुमारास इमारतीच्या तळमजल्यावर आग लागली होती. इमारतीला आग लागताच रहिवाशांनी तत्काळ घराबाहेर धाव घेत आग विझवण्याचा प्रयत्न केला.

यादरम्यान स्थानिक विनोबा भावे नगर पोलीस आणि अग्निशमन दल माहिती मिळताच जवान घटनास्थळी दाखल झाले. अग्निशमन दलाच्या जवानांनी तत्काळ आगीवर नियंत्रण मिळवले. मात्र इमारतीत मोठ्या प्रमाणात धूर पसरल्याने अनेक रहिवासी ईमारतीत अडकले होते.

विनोबा भावे नगर पोलीस आणि अग्निशमन दलाच्या जवानांनी 12 व्या मजल्यापर्यंत जाऊन इमारतीत अडकलेल्या 50 ते 60 रहिवाशांची सुखरूप सुटका केली. सुदैवाने यामध्ये जीवितहानी झालेली नाही.

मात्र धुरामुळे श्वास घुसमटल्याने 39 रहिवाशांना रूग्णालयात दाखल करण्यात आले. यापैकी 4 जणांना कोहिनुर आणि इतर 35 रहिवाशांना राजावाडी रुग्णालयात दाखल करण्यात आले आहे. शॉर्टसर्किटमुळे ही आग लागल्याचा प्राथमिक अंदाज असून व्ही. बी. नगर पोलीस याबाबत अधिक तपास करत आहेत