आईची हत्या करून 22 वर्षीय तरूणाने आत्महत्या केल्याची ही धक्कादायक घटना रविवारी विक्रोळीच्या कन्नमवार नगरात घडली
मुंबई : आईची हत्या करून 22 वर्षीय तरूणाने आत्महत्या केल्याची ही धक्कादायक घटना रविवारी विक्रोळीच्या कन्नमवार नगरात घडली आहे. 54 वर्षीय उमा तावडे यांची त्यांचा मुलगा अभिषेक तावडेने जीवे मारले.
अभिषेक बेरोजगार असल्याची माहिती आहे. तसेच, त्याची मानसिक स्थिती ठीक नसल्याने या आई लेकामध्ये वारंवार वाद होत होते. त्यातूनच हे कृत्य करण्यात आल्याची शक्यता वर्तवण्यात आली आहे.विक्रोळी पोलिसांनी घटनास्थळाचा पंचनामा करत अपमृत्यूची नोंद केली आहे.
यामध्ये काही संशयास्पद असे काहीच आढळले नसल्याचे पोलिसांनी म्हटले आहे. दरम्यान, अभिषेक याने आईची हत्या करून आत्महत्या का केली असावी, यामागील नेमके कारण समजू शकले नसल्याचेही पोलिसांनी सांगितले. पुढील तपास पोलिस करत आहेत.
मुंबईतील विक्रोळी परिसरातील कन्नमवार येथील गुलमोहर सोसायटीमध्ये अभिषेक हा आई-वडिलांसोबत वास्तव्यास होता. त्याचे वडील लोअर परळ येथे खाजगी कंपनीत कार्यरत होते. अभिषेकची आई एका दवाखान्यात काम करते.
आई आणि मुलामध्ये रोज भांडणं होत असल्याची माहिती आहे. त्यामुळे या भांडणाला कंटाळून वडील कार्यालयातच थांबायचे. ते आठवड्यातून फक्त रविवारी घरी जात होते. नेहमीप्रमाणे वडील रविवारी घरी आले आणि त्यांनी दरवाजा ठोठावला.
मात्र, दरवाजा कुणीही उघडला नाही. त्यामुळे मुलाला आणि पत्नीला आवाज दिला. तरीही आतून कुणीच प्रतिसाद दिला नाही. त्यानंतर वडिलांनी शेजारच्यांच्या मदतीने पोलिस आणि अग्निशमन दलाला याची माहिती दिली. घटनेचं गांभीर्य पाहता पोलिस आणि अग्निशमन दल तात्काळ घटनास्थळी दाखल झाले. अग्निशमन दलाच्या जवानांनी दरवाजा तोडला. तेव्हा घरात उमा या बेडरुमध्ये मृतावस्थेत आढळल्या तर अभिषेक बाहेरच्या खोलीत गळफास लावलेल्या स्थितीत आढळून आला.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.