पुणेकरांना मिळणार पुरेसे पाणी; पण पाणीपट्टीचे काय?

पुणे : पुण्यातील वाढत्या लोकसंख्येला पुरेल इतके म्हणजे साडेसतरा टीएमसी पाणी देण्याचा महापालिकेचा पाटबंधारे खात्याकडे आग्रह कायम आहे. सध्या जुन्या कराराप्रमाणे साडेअकरा "टीएमसी' पाणी मिळत असले, तरी पुरेशा पाण्यासाठी लढाई सुरूच आहे, असे महापालिका प्रशासनाने गुरुवारी (ता.21) पुन्हा स्पष्ट केले.

जादा पाण्याचा प्रस्ताव पाटबंधारे खात्यामुळेच रेंगाळला असून, जादा पाणीपट्टी आकारण्याचा अधिकार या खात्याला नाही, असे महापालिकेने म्हटले आहे. त्यामुळे पुणेकरांना जुन्या दरानेच पुरेसे पाणी मिळण्याची शक्‍यता निर्माण झाली आहे.

- 'सकाळ'चे मोबाईल ऍप डाऊनलोड करा

महापालिका आणि पाटबंधारे खात्यातील पाणीसाठ्याचा करार सर्वसाधारण सभेत ठेवण्यात आला होता. या पार्श्‍वभूमीवर किती पाणीसाठा मागितला आहे, तो किती लोकसंख्येला पुरेल, नवा प्रस्ताव मंजूर का होत नाही, आदी प्रश्‍न उपस्थित करीत सदस्यांनी पाण्याची गरज आणि मागणी जाणून घेतली. त्यावर पाणीपुरवठा खात्याचे प्रमुख व्ही. जी. कुलकर्णी यांनी खुलासा केला.

ते म्हणाले, "शहरासाठी साडेअकरा "टीएमसी' पाणी घेण्याचा करार चालू महिन्यात संपला. सहा महिन्यांचा तात्पुरता करारही संपल्याने साडेसतरा "टीमएमसी'चा प्रस्ताव पाठविला आहे. परंतु, पाटबंधारे खात्याने तो राज्य सरकारकडून मंजूर करून घेतला नाही. त्याच्या मंजुरीसाठी पाठपुरावा करीत आहोत. त्यामुळे पुणेकरांच्या गरजेइतके पाणी मिळेल. मात्र, करारापेक्षा अधिक पाणी घेतल्यास जादा पाणीपट्टी घेण्याचा अधिकार महाराष्ट्र जलसंपत्ती नियमन प्राधिकरणाला आहे. सध्या आपण कालव्यातून नव्हे तर धरणातून पाणी घेत असल्याने त्याचा दहा हजार लिटरचा दर 25 पैसे इतका आहे. '' 

- जिंतेंद्र आव्हाड का म्हणतायेत अण्णा उठायची वेळ झाली?

थकबाकी नाही 
पाटबंधारे खात्याची कोणतीही थकबाकी महापालिकेकडे नाही. आधी 410 कोटी रुपयांची थकबाकी दाखविणाऱ्या खात्याने हा आकडा अडीचशे कोटी रुपयांपर्यंत कमी केला. त्यानंतर दीडशे कोटी रुपये आणला. त्यातून 120 कोटी रुपये दिले आहेत. आणखी 25 कोटी रुपये देण्याचे नियोजन आहे, असेही कुलकर्णी यांनी सांगितले. 

- पुण्याच्या महापौरपदासाठी उद्या निवडणूक

कालव्याचा मिळकतकर वसूल करणार 
करार संपल्यानंतर पाणी घेतल्यास दुप्पट पाणीपट्टी वसुलीचा इशारा देणाऱ्या पाटबंधारे खात्याला "धडा' शिकविण्याची भूमिका महापालिकेने घेतली आहे. शहरातून वाहणाऱ्या 19 किलोमीटर लांबीच्या कालव्याचा मिळकतकर वसूल करण्यात येणार असून, त्यासाठी या खात्याला पत्र पाठविले आहे. व्यावसायिक दराप्रमाणे कालव्याला मिळकतकर आकारून, त्याची थकबाकीही वसूल करणार आहोत, असेही कुलकर्णी यांनी स्पष्ट केले.

- INDvWI : कसाही असो आम्हाला पंतच हवा; संधी न देताच सॅमसनला डच्चू!