Sundar Pichai: सुंदर पिचाई यांनी गुगलमध्ये पूर्ण केली 20 वर्षे; म्हणाले, ''खूप काही बदलले आहे, माझे केसही...''

20 Years In Google: गुगल कंपनीचे सीईओ सुंदर पिचाई यांनी कंपनीतील त्यांचा वीस वर्षांचा प्रदीर्घ प्रवास पूर्ण केला आहे. पिचाई यांनी इंस्टाग्रामवर एका पोस्टद्वारे या खास प्रसंगी आपला आनंद व्यक्त केला आहे. गुगल या एकाच कंपनीत दोन दशके पूर्ण केल्याबद्दल पिचाई यांनी इंस्टाग्रामवर एक छोटी टीप शेअर केली. त्यांच्या पोस्टमध्ये त्यांनी गेल्या 20 वर्षातील त्यांच्या प्रवासाची झलक दिली आहे.

पिचाई यांनी आपल्या पोस्टमध्ये म्हटले आहे की, “26 एप्रिल 2004 माझा गुगलमध्ये पहिला दिवस होता. तेव्हापासून बरेच काही बदलले आहे – तंत्रज्ञान, आमची उत्पादने वापरणाऱ्या लोकांची संख्या... माझे केस. काय बदलले नाही – या कंपनीसाठी काम करताना मला आनंद मिळतो. 20 वर्षांनंतरही मी स्वतःला भाग्यवान समजतो"

सुंदर पिचाई यांनी शेअर केलेल्या इंस्टाग्राम पोस्टसोबत एक फोटोही शेअर केला आहे. काही फुगे चित्रात दाखवले आहेत, ज्यात '20' अंक असणारे दोन फुगे आहेत. याशिवाय एक दिवा देखील आहे ज्यावर '20 वर्षे पूर्ण झाल्याबद्दल अभिनंदन' असे लिहिले आहे. टेबलावर दोन फोटो देखील आहेत.

पिचाई यांनी 26 एप्रिल रोजी रात्री उशिरा ही पोस्ट शेअर केली होती, ज्याला आतापर्यंत 91,000 हून अधिक लाईक्स मिळाले आहेत. या पोस्टवर अनेकांनी कमेंट केल्या आहेत. पिचाई यांच्या पोस्टवर काही लोकांनी 'अभिनंदन' लिहिले.

एका युजरने असेही म्हटले की, तुमचे केस कमी झाले आहेत, पण गुगलचा महसूल वाढला आहे. सुंदर पिचाई हे गुगल आणि अल्फाबेटचे सीईओ आहेत आणि अल्फाबेटच्या संचालक मंडळात त्यांचा समावेश आहे. ते 2004 मध्ये कंपनीत प्रोडक्ट मॅनेजर म्हणून रुजू झाले होते.