Share Market Closing: शेअर बाजारात किंचीत घसरण; सेन्सेक्स 61,900 च्या पातळीवर बंद, आज 'या' शेअर्समध्ये...

Share Market Closing 11 May 2023: आजच्या व्यवहार सत्रात भारतीय शेअर बाजारातील दोन प्रमुख निर्देशांक सेन्सेक्स आणि निफ्टी किंचीत घसरणीसह व्यवहार करताना दिसले. बँकिंग, एफएमसीजी क्षेत्रातील शेअर्समध्ये खरेदी दिसून आली.

त्यामुळे मिडकॅप शेअर्समध्येही तेजी दिसून आली. असे असतानाही सेन्सेक्स 36 अंकांच्या किंचित घसरणीसह 61,904 वर बंद झाला आणि राष्ट्रीय शेअर बाजाराचा निफ्टी 18 अंकांच्या घसरणीसह 18,927 अंकांवर बंद झाला.

बाजारात सर्वाधिक विक्री होणारे क्षेत्र हे फार्मा आणि हेल्थकेअर होते. NSE वर निफ्टी फार्मा निर्देशांक 1.34% घसरून बंद झाला. खराब निकालामुळे डॉ. रेड्डीजचा शेअर 7 टक्क्यांच्या आसपास घसरला. तर अदानी समूहाच्या शेअर्समध्ये तेजी दिसून आली.

हे शेअर्स निफ्टीमध्ये सर्वाधिक वाढणारे होते. याआधी बुधवारी देशांतर्गत बाजारात तेजी होती. BSE सेन्सेक्स 178 अंकांनी 61,940 वर बंद झाला आणि निफ्टी 49 अंकांनी 18,315 वर बंद झाला.

शेअर बाजारातील महत्त्वाचे मुद्दे:

• अमेरिकेतील एप्रिल महागाईचे आकडे

• जागतिक बाजारातून संमिश्र संकेत

• हेवीवेट स्टॉक्समध्ये फ्लॅट ट्रेडिंग

• फार्मा आणि ऑटो अॅन्सिलरीज कंपन्यांचे निकाल

आजच्या व्यवहारात बँकिंग, ऑटो, आयटी, एफएमसीजी, एनर्जी, कंझ्युमर ड्युरेबल्स क्षेत्रातील शेअर्समध्ये खरेदी झाली. तर हेल्थकेअर, इन्फ्रा, मेटल्स, फार्मा क्षेत्रातील शेअर्स घसरले. शेअर्सच्या खरेदीमुळे मिड कॅप आणि स्मॉल कॅप निर्देशांकातही तेजी दिसून आली.

सेन्सेक्समधील 30 शेअर्सपैकी 22 शेअर्स वाढीसह आणि 8 शेअर्स घसरणीसह बंद झाले. निफ्टीच्या 50 शेअर्सपैकी 26 वाढीसह आणि 24 शेअर्स घसरणीसह बंद झाले.

गुंतवणूकदारांच्या संपत्तीत वाढ

निर्देशांक घसरणीसह बंद झाले असले तरी गुंतवणूकदारांच्या संपत्तीत मोठी वाढ झाली आहे. आज, बाजार बंद असताना, बीएसईवर सूचीबद्ध कंपन्यांचे मार्केट कॅप 278.06 लाख कोटी रुपयांवर पोहोचले आहे, जे बुधवारी 277.10 लाख कोटी रुपये होते. आजच्या सत्रात गुंतवणूकदारांच्या संपत्तीत 96,000 कोटी रुपयांची वाढ झाली आहे.