Viral Video : शॉपिंग मॉलमध्ये घुसली गाय आणि मग....

मुंबई : काही लोक खरेदीसाठी आपला कुटुंबकबिला घेऊन शॉपिंग मॉलमध्ये जातात तर काही लोक एकटेच टाइमपास करण्यासाठी मॉलमध्ये फिरत बसतात.

सध्या सोशल मीडियावर एका मॉलमधील व्हिडिओ व्हायरल होत आहे. यातील मॉल कर्मचारी बरेच गोंधळलेले दिसत आहे; कारण रोज मानवी रुपातील ग्राहक बघण्याची सवय झालेल्या कर्मचाऱ्यांना यावेळी वेगळाच अनुभव येत आहे. हेही वाचा - द मिसिंग टाइल सिंड्रोम ठेवा आपल्यापासून दूर

व्हायरल झालेल्या या व्हिडिओमध्ये एक गाय दिसत आहे जी एका शॉपिंग मॉलमध्ये घुसली आहे. धुमाकूळ घालणाऱ्या या गाईच्या मागे मॉल कर्मचारी धावत आहेत. मॉलमध्ये कपड्यांच्या विभागात शिरलेल्या या गाईला आवरताना मॉल कर्मचाऱ्यांची चांगलीच तारांबळ उडाली आहे.

हा व्हिडिओ कोणत्या मॉलमधील आहे हे समजायला मार्ग नाही. मॉलच्या कपड्यांच्या विभागात ही गाय शिरली आहे. तेथे नीट मांडून ठेवलेल्या कपड्यांच्या अधूनमधून ही गाय धावते आहे.

कर्मचारी तिच्या मागे धावत आहेत तर काहीजण तिचा व्हिडिओ बनवत आहेत. पण तिला मात्र कसलीच पर्वा नाही. ती बिनधास्त मॉलमध्ये इथून-तिथे पळत आहे.

नेटकऱ्यांनी या व्हायरल व्हिडिओवर बऱ्याच कमेंट्स केल्या आहेत. कोणी म्हणतंय 'तिला शॉपिंग करायची असेल' तर, कोणी म्हणतंय 'तिचा १ तारखेला पगार झाला असेल'.