सख्या बहिणीचा खून करुन रात्रीच उरकला अंत्यविधी; आरोपी गजाआड

निजामपूर (धुळे) : बावीस वर्षीय बहिणीचे कोणाशीतरी प्रेमसंबंध असल्याचा संशय व त्याच्यासोबत ती पळून जायच्या बेतात असल्याचा राग मनात धरून तिला मारहाण करून, गळफास लावून खून करत सोमवारी (ता.१३) रात्रीच तिचा अंत्यविधी उरकून टाकल्याची दुर्दैवी घटना बुधवारी (ता. १५) उघडकीस आली. पोलिसांनी अत्यंत शिताफीने संशयित भावास गजाआड केले आहे.

बुधवारी (ता.१५) स्थानिक गुन्हे अन्वेषण शाखेचे पोलिस निरीक्षक हेमंत पाटील, निजामपूर पोलिस ठाण्याचे सहाय्यक पोलिस निरीक्षक श्रीकांत पाटील यांना संदिप रमेश हालोर (वय-२४) रा.हट्टी (ता.साक्री) याने त्याची बहिण पुष्पा हिचे कोणाशीतरी प्रेमसंबंध असल्याचा संशय घेवून तिस मारहाण करत गळफास लावून मारले व रात्रीच तिचा अत्यंविधी आटोपून टाकला, अशी गोपनीय माहिती मिळाल्याने निजामपूरचे सहाय्यक पोलिस निरीक्षक श्रीकांत पाटील, उपनिरीक्षक दिपक वारे, हवालदार कांतीलाल अहिरे, पोलिस नाईक संदिप ठाकरे, पोलिस शिपाई नरेंद्र माळी, अवधुत होंडे यांच्या तपास पथकाने हट्टी गाव परिसरात रवाना होवून बातमीची खातरजमा केली असता आरोपी संदीप हालोर हा गावातच मिळून आला.

दरम्यान पोलिसांनी त्यांच्या तपास कौशल्याव्दारे त्यास विश्वासात घेवून विचारपूस केली असता आरोपीने गुन्हा केल्याची कबुली दिली व सांगितले कि, हट्टी गावाशिवारातील शिवमेंढा येथे रात्रीचे तीन वाजेचे सुमारास त्याची बहीण पुष्पा रमेश हालोर (वय-२२) हिचे धुळे तालुक्यातील नवलाणे येथील सागर बागुल याचे सोबत प्रेमसंबंध असल्याने ती पळून जाण्याच्या बेतात असल्याने, त्याचा राग मनात धरून त्याने तिचे अंगावरील साडीची लेस फाडून निंबाच्या झाडाला बांधून फास तयार करत, गळफास लावून जीवे ठार मारण्याच्या इराद्याने ढकलून देत तिचा जीव जाईपर्यंत तेथेच थांबून राहिला व त्यांनतर घरी जावून पुष्पा हिने स्वत:च्या हाताने गळफास घेवून मयत झाल्याचे भासवून आई व मित्रांसह गावातील लोंकाना खोटी माहिती दिली व पहाटे पाचच्या सुमारास तिच्यावर अंत्यसंस्कार केले. अंत्यविधी करते वेळी तिचे अंगावरील सर्व कपडे तसेच गळफास तयार केलेली साडीची लेस असे सर्व पुरावे नष्ट करण्याच्या हेतूने दहनात टाकून पुरावे नष्ट केल्याचे सांगितले.

पोलिस नाईक संदीप ठाकरे यांनी दिलेल्या फिर्यादीवरुन निजामपूर पोलिस ठाण्यात संशयिताविरुद्ध खुनाचा गुन्हा दाखल करण्यात आला. पोलिस उपनिरीक्षक दीपक वारे घटनेचा पुढील तपास करीत आहेत. पोलिस अधिक्षक प्रविणकुमार पाटील, अप्पर पोलिस अधिक्षक प्रशांत बच्छाव, उपविभागीय पोलिस अधिकारी दिनकर पिंगळे, पोलिस निरीक्षक हेमंत पाटील यांच्या मार्गदर्शनाखाली सहाय्यक निरीक्षक श्रीकांत पाटील, उपनिरीक्षक दीपक वारे, हवालदार कांतीलाल अहिरे, पोलिस नाईक संदीप ठाकरे, पोलिस शिपाई नरेंद्र माळी, अवधुत होंडे यांनी ही चोख कामगिरी केली आहे.