दहावीच्या निकालात इंटरमिजिएटसाठी श्रेणी; मिळणार अतिरिक्त गुण

नाशिक : माध्यमिक शालांत प्रमाणपत्र परीक्षेस २०२०-२१ मध्ये बसलेल्या विद्यार्थ्यांनी एलिमेंटरी ड्राॅइंग परीक्षा उत्तीर्ण केली आहे, पण त्यांना कोरोनामुळे इंटरमिजिएट ड्राॅइंग परीक्षा देता आली नाही. त्यामुळे दहावीच्या निकालात आता एंटरमिजिएट परीक्षेतील श्रेणी विद्यार्थ्यांना इंटरमिजिएटसाठी मिळणार आहे. त्याच्या आधारे दहावीत अतिरिक्त गुणांची सवलत दिली जाणार आहे. (extra-marks-in-10th-result-nashik-marathi-news)

उच्च व तंत्रशिक्षण विभागाचा निर्णय

याबाबत उच्च व तंत्रशिक्षण विभागाने बुधवारी (ता.१६) निर्णय घेतला. कोरोनामुळे गेल्या वर्षी राज्यातील सरकारी रेखाकला परीक्षा घेतलेल्या नाहीत. शिवाय कोरोना काळातील आरोग्याच्या विचार करता, या परीक्षा घेऊ नयेत, असे सरकारने पुन्हा स्पष्ट केले आहे. शिवाय कला शिक्षण प्रशिक्षण पदविका (एटीडी) आणि मूलभूत अभ्यासक्रम (फाउंडेशन) या दोन अभ्यासक्रमांना २०२०-२१ या शैक्षणिक वर्षासाठी प्रवेश घेतलेल्या विद्यार्थ्यांसाठी इंटरमिजिएट परीक्षा उत्तीर्ण होण्याच्या अटीमधून सूट दिली आहे. ही सूट २०२०-२१ साठीच राहील, असेही विभागाने स्पष्ट केले आहे.