Vidhan Sabha 2019 : जनकल्याणातून आपल्याला राष्ट्रनिर्माण करायचे आहे - नरेंद्र मोदी

सकाळ वृत्तसेवा
रविवार, 13 ऑक्टोबर 2019

- विकास करणाऱ्यालाच मतदार निवडतात
- पंतप्रधान मोदी यांचे प्रतिपादन
​- सेंदूरवाफा येथे जाहीर सभा

साकोली (जि. भंडारा) : मतदार आता आंधळेपणाने मतदान करीत नाही. तो विकास करणाऱ्यालाच मते देतो आणि गेले पाच वर्षांत भाजप सरकारने विकासाची अनेक कामे केली आहेत. घराघरांत शौचालये झाली, ग्रामीण भागात सर्वांना वीज पुरविण्यात आली, गरिबांचे घरांचे स्वप्न साकार होत आहे, चांगल्या दर्जेदार रुग्णालयातून मोफत आरोग्यसेवा मिळत आहे. हे सगळे सरकारने केलेल्या कामाचे परिणाम आहेत. या जनकल्याणातूनच आपल्याला राष्ट्रनिर्माण करावयाचे आहे, असे प्रतिपादन पंतप्रधान नरेंद्र मोदी यांनी केले. रविवारी साकोली-सेंदूरवाफा येथे आयोजित जाहीर सभेत ते बोलत होते.

छत्रपती शिवाजी महाराज यांच्या प्रतिमेला पुष्पहार अर्पण करून नरेंद्र मोदी यांनी आपल्या भाषणात सर्वप्रथम जिल्ह्यातील वैनगंगा व चुलबंद नद्यांना नमन केले व झाडीपट्टीतील धान उत्पादकांसोबत मराठीतून संवाद साधला. यावर्षी धानाचे पीक चांगले आहे काय? राज्य सरकारने धानाला बोनस दिला की नाही? असे प्रश्‍न त्यांनी उपस्थितांना विचारले. यापूर्वी लोकसभा निवडणुकीत गोंदिया येथे तुम्हाला आशीर्वाद मागितला होता. तो तुम्ही इतका दिला की, राजकीय विश्‍लेषकांचे अंदाज, आडाखे खोटे ठरलेत. त्याबद्दल पंतप्रधानांनी मतदारांचे आभार मानले.

अजान सुरु होताच राहुल गांधीनी थांबविले भाषण

आमच्या सरकारने कोणत्याही जाती समुदायाच्या नावाने योजना राबविल्या नाहीत. मात्र दलित, शोषित, आदिवासी, गरीब अशा समाजातील सर्वच घटकांना योजनांचा फायदा मिळवून दिला आहे. या देशातील आपण सर्व एका कुटुंबाप्रमाणे आहोत. डॉ. बाबासाहेब आंबेडकर, संत तुकाराम, संत संताजी महाराज या महापुरुषांना हेच अभिप्रेत होते, असे मोदी म्हणाले. 

भाजप उमेदवाराच्या प्रचार रॅलीत अपघात (व्हिडिओ)

महाराष्ट्रात मुख्यमंत्री देवेंद्र फडणवीस यांनी राज्याचे नेतृत्व करून अनेक कामे केली आहेत. तेव्हा 2014 प्रमाणेच यावेळीही राज्यात भाजप युतीचे सरकार येईल, असा विश्‍वास व्यक्त करून पंतप्रधान म्हणाले की, भंडारा जिल्ह्यातील गोसेखुर्द प्रकल्पाचे काम पूर्ण झाले आहे. त्याचा फायदा आता भंडारा, नागपूर व चंद्रपूर या जिल्ह्यातील शेतकऱ्यांना मिळणार आहे. यापूर्वी सिंचन, पाणीपुरवठा, बंधारे, प्रकल्प वेगवेगळ्या विभागात होते. परंतु, या सरकारने हे सर्व विभाग जलशक्ती मंत्रालयाशी जोडले आहेत.

भाजप नेत्याच्या मनसेच्या उमेदवाराला शुभेच्छा; व्हिडिओ व्हायरल

येत्या पाच वर्षांत साडेतीन लाख रुपये खर्चातून जलसंसाधनांचा विकास करण्यात येणार आहे. शुद्ध पाण्याचा ग्रामीण भागात पुरवठा होईल. ग्रामीण भागात पायाभूत सुविधा निर्माण करण्यासाठी 25 लाख कोटी रुपयांचा निधी उपलब्ध होणार आहे. या सर्व विकासकामांमुळे शेतकरी वर्गात आत्मविश्‍वास निर्माण होईल. रोजगार निर्मिती होईल. मजूर, आदिवासी, लहान व्यापारी या वर्गातील वृद्धांना 60 वर्षांनंतर पेन्शन देण्यात येईल, सामान्य नागरिकांना आरोग्य, शिक्षण व चांगले रस्ते या सेवा मिळाव्यात यासाठी सरकार अधिक प्रयत्न करणार असल्याचेही पंतप्रधान यावेळी म्हणाले. 

म्हणून काका कुडाळकरांनी नाकारली काँग्रेसची उमेदवारी

या सभेला केंद्रीय मंत्री रामदास आठवले, प्रदेश प्रभारी सरोज पांडे, राज्याचे उर्जामंत्री व पक्षाचे पूर्व विदर्भ प्रचार प्रमुख चंद्रशेखर बावनकुळे, आमदार अनिल सोले, खासदार सुनील मेंढे, डॉ. हेमकृष्ण कापगते, तसेच भंडारा व गोंदिया जिल्ह्यातील भाजपचे उमेदवार उपस्थित होते. 

पर्यटनातून रोजगार
भंडारा जिल्ह्यातील नागझिरा-नवेगाव बांध व्याघ्र प्रकल्पात देशभरातील पर्यटक येतात. त्यातून येथील आदिवासी व गरीब युवकांना रोजगार निर्माण व्हावा. याकरिता व्यवसाय करण्यास सुलभ कर्ज उपलब्ध करून दिले जाईल. त्यामुळे ग्रामीण व जंगलव्याप्त भागात रोजगार संधी निर्माण होतील, असे पंतप्रधानांनी यावेळी सांगितले. 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: PM Modi addresses rally in Sakoli District Bhandara Maharashtra