सातारा - मागील तीन ते चार महिन्यांपासून कांद्याचे दर शेतकऱ्यांना दिलासा देणारे मिळत असल्याने कांदा लागवडीकडे जिल्ह्यातील शेतकऱ्यांचा वाढला आहे. यामुळे कांदा रोपाची मागणी वाढल्याने रोपाचे दर तेजीत आले आहे. पूर्वी वाफ्यावर होणारी रोपांची विक्री आता फुटावर केली जात आहे.

Success story: शेळीपालनाने दिली आर्थिक प्रगतीची दिशा...

रब्बी हंगामात जिल्ह्यात महाबळेश्वर तालुक्याचा अपवाद वगळता कांद्याची लागवड केली जाते. रब्बीत माण, खटाव, फलटण, कोरेगाव, खंडाळा या तालुक्यातील होणारी लागवड आता पश्चिमेकडील सातारा, कऱ्हाड, वाई, जावली, पाटण तालुक्यातही क्षेत्रात वाढ झाली आहे. पश्चिमेकडील तालुक्यात उसात आंतरपीक म्हणून लागवड करण्याचा कल वाढला आहे. कांद्याच्या रोपाची ते बियाण्याची मागणी वाढली आहे. साधारणपणे कांद्याची तीन ते चार हजार रुपये किलो बियाण्याचे दर गेले आहेत. सध्या रोपाची लागण वेगाने सुरू झाली आहे. पूर्वी वाफ्यावर कांद्याची रोपाची विक्री केली जात होती. मात्र, आता कांद्याचे दर तेजीत असल्याने रोपांची विक्री फुटावर केली जात आहे. यामुळे एक एकर क्षेत्रासाठी रोपांना कमीत कमी १८ ते २० हजार रुपये खर्च येत आहे. यामुळे भांडवली खर्चात दुप्पटीपेक्षा जास्त खर्च येत आहे. जिल्ह्यात मागील चार ते पाच वर्षांपासून कांद्याच्या क्षेत्रात वाढ होत गेली आहे. नऊ ते दहा हजार क्षेत्रावर होणारी कांदा लागवड या हंगामात सुमारे १२ ते १३ हजार हेक्टरपेक्षा जास्त क्षेत्रावर लागवड होण्याचा अंदाज व्यक्त केला आहे. 

आणखी बातम्या वाचण्यासाठी क्लिक करा

निर्यातबंदी हटविणे गरजेचे
कांद्याचे दर समाधानकारक राहतील या आशेवर कांदा लागवड केली जात आहे. सध्या मिळत असलेल्या दराच्या हिशोबावर रोपाचे दर वाढले असल्याने शेतकऱ्यांचा भांडवली खर्च वाढला आहे. मात्र पुढील काळात कांदा निर्यातीवरील बंदी उठली नाही तर कांद्याच्या दरात घसरण होणार आहे. दुदैवाने असे झाल्यास भांडवली खर्च आणि मिळणारा दर यामध्ये मोठी तफावत होऊन शेतकऱ्यांना तोटा सहन करावा लागणार आहे.

हेही वाचा : फुलांच्या शेतीला हवा ‘एकी’चा दरवळ