नगर : कोरोनाच्या प्रादुर्भावामुळे अनेकांचे व्यवसाय बंद पडले आहेत. मात्र, महिला बचतगटांनी या काळात मास्कची मोठ्या प्रमाणावर निर्मिती करून उत्पन्न मिळविले आहे. जिल्ह्यातील 102 बचतगटांनी पावणेतीन लाख मास्कची निर्मिती करून 38 लाखांचे उत्पन्न मिळविले आहे. 

महाराष्ट्र राज्य ग्रामीण जीवनोन्नती अभियानात महिला बचतगटांना विविध प्रकारचे प्रशिक्षण देऊन त्यांच्याकडून वर्षभर विविध साहित्य व उत्पादनांची निर्मिती करण्यात येत आहे. यासाठी जिल्हा ग्रामीण विकास यंत्रणेअंतर्गत महिला बचतगटांनी तयार केलेल्या मालाच्या मार्केटिंगसाठी जिल्हास्तरावर मार्केटिंग अधिकाऱ्याची नियुक्ती केली आहे. त्यामुळे महिला बचतगटांच्या उत्पादित मालाला बाजारपेठ उपलब्ध होत आहे.

हेही वाचा ः बांधकामचे स्थलांतर होणार ऐतिहासिक वास्तूत

सध्या कोरोनामुळे मास्कला मागणी वाढली आहे. मागणी जास्त व पुरवठा कमी, अशी स्थिती असल्यामुळे ग्रामीण भागातील महिलांनी सुती कपड्यांपासून मास्क तयार करण्यास सुरवात केली आहे. जिल्ह्यातील 102 बचतगटांनी पावणेतीन लाख मास्कची निर्मिती केली. त्यांतील दोन लाख 72 हजार मास्कची विक्री झाली असून, त्यातून 37 लाख 95 हजार 100 रुपयांचे उत्पन्न या बचतगटांना मिळाले आहे. यामध्ये जिल्ह्यातील सर्वच तालुक्‍यांतील बचतगट सहभागी झाले आहेत.

क्लिक करा ः नागरिकांसाठी पक्ष एकवटले

बचत गटांच्या मास्कला प्रतिसाद ः यादव 

कोरोनामुळे मास्कचा तुटवडा जाऊ लागल्यानंतर महिला बचतगटांनी मास्कची निर्मिती केली आहे. या मास्कना जिल्ह्यात चांगला प्रतिसाद मिळाला असून, 102 बचतगटांनी 37 लाख 95 हजार 100 रुपयांचे उत्पन्न मिळविले आहे. 
- परीक्षित यादव, प्रकल्प संचालक, ग्रामीण विकास यंत्रणा 

तालुकानिहाय बचतगटांची संख्या 
शेवगाव ः 16, पाथर्डी ः 18, कोपरगाव ः आठ, नगर ः आठ, राहाता ः सहा, पारनेर ः चार, जामखेड ः दहा, श्रीरामपूर ः एक, संगमनेर ः 12, श्रीगोंदे ः दहा, कर्जत ः चार, अकोले ः पाच.