नगर ः सरकारी व खासगी लॅबमधील अहवालांचा ताळमेळ जुळत नसल्याने, सोशल मीडियावर आकड्यांचा खेळ रंगला आहे. यामुळे सर्वसामान्य जनता मात्र भयभीत होत आहे. आकड्यांचा मेळ जुळविण्यासाठी प्रशासनाने खासगी व सरकारी आकडेवारी एकत्र जाहीर करण्याची सूचना असली, तरी अवमेळ सुरूच आहे. 

अवश्‍य वाचा ः महापालिकेची स्थायी समितीची सभा होणार ऑनलाईन 

कोरोनाचा प्रसार रोखण्यासाठी प्रशासनाकडून प्रयत्नांची पराकाष्ठा सुरू आहे. उपाययोजना केल्या जात आहेत; परंतु जिल्ह्यात दिवसेंदिवस बाधितांची संख्या वाढतच आहे. शहरासह आता ग्रामीण भागातही कोरोनाने पाय पसरले आहेत. सुरवातीला जिल्हा रुग्णालयात कोरोना चाचणी होत होती.

हेही वाचा ः कर्मचाऱ्यांच्या बदल्या व्हिडिओ कॉन्फरन्सद्वारे 

आता त्यांच्या जोडीला खासगी लॅब आल्या. त्यामुळे तपासणीच्या कामाला वेग आला. मात्र, खासगी लॅबमधून सरकारी यंत्रणेला माहिती दिली जात नाही. त्यामुळे सरकारी व खासगी आकड्यांचा ताळमेळ जुळत नसल्याचे चित्र आहे. 

खासगी व सरकारी यंत्रणेत सुसूत्रता यावी, यासाठी जिल्हाधिकाऱ्यांनी अध्यादेश काढून, खासगी लॅबने अद्ययावत माहिती जिल्हा रुग्णालयाला द्यावी, असा आदेश दिला. मात्र, तरीही खासगी यंत्रणा जिल्हा रुग्णालयास माहिती न देता, खासगी व्यक्तींना देते. अशा खासगी व्यक्तींकडून सोशल मीडियावर प्रसार केलेले आणि सरकारी यंत्रणेकडून मिळालेले आकडे यांत तफावत राहते. त्यातून जनतेमध्ये संभ्रम निर्माण होत आहे. 

खासगी यंत्रणेकडून कोरोनाबाधितांची आकडेवारी व पूर्ण माहिती वेळेत मिळत नसल्यामुळे सरकारी यंत्रणेला कॉन्टॅक्‍ट ट्रेसिंग करतानाही अडचणी येत आहेत. हा प्रकार असाच सुरू राहिला, तर संसर्ग वाढण्याची भीती व्यक्त होत आहे. 

अफवांचे पीक जोरात 
कोरोनाबाबत अफवा व टीकाटिपण्णी करणाऱ्यांवर कारवाई करण्याचा आदेश जिल्हाधिकाऱ्यांनी दिला आहे; मात्र तरीही सोशल मीडियावर कोरोनाबाबत चुकीची आकडेवारी फिरवून जनतेत संभ्रम निर्माण केला जात आहे. हा प्रकार सोशल मीडियावरील अनेक ग्रुपवर सुरू असूनही, संबंधितांवर कारवाई होत नाही. त्यामुळे अफवांचे पीक जोरात आहे. 

खासगी लॅबमधील तपासणी झालेल्या अहवालांची माहिती पोर्टलवर त्वरित अपलोड करणे गरजेचे आहे. त्यामुळे कॉन्टॅक्‍ट ट्रेसिंग करणे सोपे जाईल. याबाबत जिल्हाधिकऱ्यांनी दिलेल्या आदेशाचे सर्वांनी पालन करून जिल्हा प्रशासनाला अद्ययावत माहिती द्यावी. 
- डॉ. बापूसाहेब गाढे, नोडल अधिकारी, जिल्हा रुग्णालय