नेवासे :  शिवसेना प्रवेशानंतर  राज्याचे मृद व जलसंधारण मंत्री शंकरराव गडाख यांचे   आज नेवासे शहरात आगमन होताच त्यांचे मुस्लिम समाजाच्यावतीने जोरदार स्वागत केले. एकंदर मुस्लिम समाजालाही गडाखांचा शिवसेना प्रवेश भावला. तालुक्यातील विविध सामाजिक, राजकीय संघटनांकडूनही मंत्री गडाखांचे सत्कार केला. 

नेवासे तालुक्याचे लोकप्रतिनिधी आणि  राज्याचे मृद व जलसंधारण मंत्री शंकरराव गडाख यांनी शिवसेनेत प्रवेशानंतर तालुक्यात विविध गावांना भेटी दिल्या. मात्र शनिवार (ता. २९) रोजी प्रथमच त्यांचे नेवासे शहरातील त्यांच्या संपर्क कार्यालयात आगमन झाले.  
मंत्री शंकरराव गडाख यांचे आगमन होताच त्यांचा  शिवसेना प्रवेशबद्दल  मुस्लिम समाजाच्या वतीने ज्येष्ठ नेते गफूर बागवान, युवानेते असिफ पठाण, अब्दुल्ला बागवान  यांच्या हस्ते सत्कार करण्यात आला. यावेळी उपनगराध्यक्ष नंदकुमार पाटील, नगरसेवक अॅड. काकासाहेब गायके,  बाळासाहेब कोकणे, सुलेमान मणियार,  नारायण लोखंडे, पंकज जेधे  उपस्थित होते. 

हेही वाचा - नगरच्या नातीने जिंकले व्हाईट हाऊस

यावेळी मंत्री गडाखांनी उपस्थित प्रत्येक कार्येकर्त्यांशी संवाद साधून कोरोना महामारीच्या विरोधीतील लढ्यात सर्वांनी सरकारला सहकार्य करण्यासाठी नियमांचे पालन करून स्वतः बरोबरच परिवार व समाजाची काळजी घेण्याचे आवाहन केले.

या प्रसंगी नबाब बागवान, महेश कोकणे, अब्बास बागवान, हरून बागवान, समीर बागवान, युसुफ बागवान, फरदिन पठाण उपस्थित होते.  

गफूरभाईंचा 'जय महाराष्ट्र'
मंत्री गडाखांचा शिवसेना प्रवेश झाल्यानंतर संपूर्ण नेवासे तालुका 'जय महाराष्ट्र' मय झाला. तेव्हापासून गडाखांचा कार्येकर्ता असो की, चाहता नाहीतर विरोधक हे सर्व एकमेकांच्या भेटीप्रसंगी  'जय महाराष्ट्र'च म्हणणार. त्याचा प्रत्यय मंत्री गडाख यांना आज आला. मुस्लिम ज्येष्ठ नेते गफूर बागवान हे कार्यालयात येताच मंत्री गडाखांसह उपस्थितांना 'जय महाराष्ट्र' म्हणताच उपस्थितांनी टाळ्या वाजवून त्यांचे स्वागत केले.

गडाख हेच आमचा पक्ष : असिफ पठाण 

"मंत्री शंकरराव गडाख हेच आमचा पक्ष आणि संघटना आहे. आम्ही सर्व मुस्लिम समाज एकजुटीने त्यांच्याच पाठीशी कायम आहे. त्यांच्या शिवसेना प्रवेशाचे आम्हाला स्वागत करतो. नेवासे तालुक्याच्या विकासासाठी ती गरजच होती. मुख्यमंत्री उद्धव ठाकरे व महाआघाडी सरकारचे काम कौतुकास्पद असल्याचे मुस्लिम युवा नेते असिफ पठाण हे म्हणाले. 
संपादन - अशोक निंबाळकर