करंजी : पाथर्डी तालुक्यातील करंजी गावापासून एक किलोमीटर अंतरावर असलेल्या कल्याण-विशाखापट्टणम या राष्ट्रीय महामार्गावर शुक्रवारी रात्री सव्वा बारा वाजण्याच्या सुमारास भावले वस्तीवर दरोडा पडला.

या दरोड्यात दरोडेखोरांच्या मारहाणीत गोपीनाथ लक्ष्मण भावले (वय ८० ) यांच्या डोक्यात लाकडी दांडक्याने मारल्याने त्यांचा जागीच मृत्यू झाला तर त्यांची पत्नी शांताबाई गोपीनाथ भावले (वय ७६ ) यादेखील या घटनेत गंभीर जखमी झाल्त्या आहेत. या घटनेची माहिती समजताच पोलीस अधीक्षक मनोज पाटील, उपअधीक्षक सौरभ अग्रवाल, उपअधीक्षक संदीप मिटके यांनी घटनास्थळी येऊन तपासाची चक्रे वेगाणे फिरवली.

या घटनेत जखमी भावले या महिलेच्या गळ्यातील सोन्याची पोत दरोडेखोरांनी ओरबडून नेली. तर मयत गोपीनाथ भावले यांच्या डोक्यात लाकडी दांडक्याने मारहाण झाल्याने घरात रक्ताचा सडा पडला होता. आजूबाजूच्या लोकांनी मदतीला येऊ नये म्हणून त्यांच्या घरावर देखील दरोडेखोरांनी दगडफेक केली. घटनेची माहिती समजताच ग्रामस्थ मोठ्या संख्येने घटनास्थळी दाखल झाले होते. एका गरीब कुटुंबातील व्यक्तीचा या दरोड्यामध्ये जीव गेल्याने परिसरात हळहळ व्यक्त करण्यात येत आहे. करंजी गावचे सरपंच बाळासाहेब आकोलकर यांनी भेट देऊन भावले कुटुंबाला धीर देण्याचा प्रयत्न केला.