Sakal Survey - नगर जिल्हा साखरसम्राटांचा. जिल्ह्यातील मातब्बर नेते शरद पवार यांना मानणारे आहेत. मात्र पवार घराण्यातच फूट पडल्याने, आपण कोणाकडे जायचे, हा प्रश्‍न येथील सहा आमदारांना होता. नीलेश लंके, संग्राम जगताप, डॉ. किरण लहामटे आणि आशुतोष काळे हे चौघे अजितदादांच्या गळाला लागले तर रोहित पवार व प्राजक्त तनपुरे यांनी शरद पवार यांची साथ सोडली नाही.

अकोल्याचे आमदार डॉ. किरण लहामटे यांनी प्रारंभी दादांना पाठिंबा दिला खरा, पण एक-दोन दिवसांतच ते मागे फिरले. जे डॉ. लहामटे आणि सीताराम गायकर हातातहात घालून मधुकर पिचड यांना शह देत होते, ते गायकरही दादांकडे गेले आहेत. आमदार संग्राम जगताप हे अजित पवार यांच्याकडे गेले आहेत. त्यांना शहरात प्रबळ विरोधक नाही.

पवारसाहेबच माझे दैवत आहेत, असे सांगणारे पारनेरचे आमदार नीलेश लंके आणि कोपरगावचे आशुतोष काळे यांनीही अजितदादांना साथ दिली. जो नगर जिल्हा पक्षाचा बालेकिल्ला होता, त्याला भगदाड पडले आहे. उरला प्रश्‍न शंकरराव गडाखांचा. ते अपक्ष आहेत आणि ठाकरे गटाला त्यांची साथ आहे.

संगमनेरमध्ये ज्येष्ठ नेते बाळासाहेब थोरात, राहात्यात भाजपचे राधाकृष्ण विखे पाटील ‘वन मॅन शो’आहेत. पाथर्डीत भाजपच्या मोनिका राजळे यांचे विरोधक प्रतापराव ढाकणे हे शरद पवार यांच्यासोबत आहेत, तर माजी आमदार डॉ. नरेंद्र घुले आणि चंद्रशेखर घुले यांची भूमिका स्पष्ट नाही. श्रीगोंद्यात माजी आमदार राहुल जगताप शरद पवार यांच्याबरोबर आहेत. तेथे कोण उमेदवार असणार याची उत्सुकता आहे. श्रीरामपूरमध्ये आमदार लहू कानडे यांनी मजबूत बांधणी केली आहे.