नगर : जिल्हा परिषद प्राथमिक व माध्यमिक शाळा 15 जूनला सुरू करायच्या की एक जुलैला, याबाबत राज्य सरकारने अद्याप ठोस निर्णय घेतलेला नाही. शाळा सुरू करण्यासंदर्भात शाळा व्यवस्थापन समित्यांकडून शिक्षण विभागाने अभिप्राय मागविले आहेत. हे सुरू असताना दुसरीकडे, मुलांचे शैक्षणिक वर्ष वाया गेले तरी चालेल; पण त्यांना शाळेत पाठविणार नाही, असा निर्धार काही पालकांनी केला आहे. त्यामुळे पालकांसह शिक्षण विभाग व शालेय व्यवस्थापन समितीपुढे संभ्रम निर्माण झाला आहे. 

हेही वाचा ः लॉकडाउन ः ऑनलाईन स्पर्धेत भाग घेताय...सावधान, तुमच्यासोबत होऊ शकतो हा धोका 

शैक्षणिक वर्ष दर वर्षी 15 जूनपासून सुरू होते. मात्र, यंदा कोरोना संकटामुळे सगळेच गणित बिघडले आहे. या वर्षीचे शैक्षणिक वर्ष 15 जूनला सुरू होते की एक जुलैला, की त्यानंतर सुरू होणार, हे अद्याप राज्य सरकारने जाहीर केलेले नाही. त्यात कोरोनाचा प्रादुर्भाव वाढतच आहे. त्यामुळे राज्य सरकारने शाळा सुरू करायची घाई करू नये, असे मत पालक व्यक्त करीत आहेत. 

अवश्य वाचा ः "कोरोना'चा मराठी शाळांना हा होणार फायदा, मास्तरांची थांबणार वणवण 

प्राथमिक शाळेतील विद्यार्थ्यांना सामाईक अंतर राखणे जमणार नाही. त्यामुळे पालकांना नेहमी काळजी लागेल. सध्या पावसाळ्याचे दिवस आहेत. त्यामुळे कोरोनाचा प्रादुर्भाव कमी होईपर्यंत विद्यार्थ्यांना शाळेत जसे अध्यापन केले जाते, तसेच अध्यापन सोशल माध्यमांचा वापर करून करावे, अशी मागणी पालकांमधून होत आहे.

क्लिक करा ः कोरोनाच्या लढाईत "गुरुजी' सरस 

दुसरीकडे, कोरोनाचा प्रादुर्भाव नसलेल्या भागात 15 जूनलाच शाळा सुरू कराव्यात, अशी मागणी होत आहे. त्यामुळे शिक्षण विभागही संभ्रमात आहे. 

शाळा सुरू करण्यासंदर्भात अद्याप कोणतेच निर्देश आलेले नाहीत. शाळा व्यवस्थापन समितीकडून अभिप्राय मागविले आहेत. कोरोनाच्या पार्श्‍वभूमीवर बाहेरगावांहून आलेल्या व्यक्तींना बहुतेक ठिकाणी शाळांमध्ये क्वारंटाईन केले आहे. त्यांतील कोणत्या ठिकाणी कोरोनाबाधित रुग्ण आढळून आले, याचीही माहिती मागविली आहे. 
- रमाकांत काठमोरे, शिक्षणाधिकारी, प्राथमिक शिक्षण विभाग 

सध्याच्या परिस्थितीत शाळा सुरू करणे योग्य नाही. सुरक्षित अंतर राखणे विद्यार्थ्यांकडून होणार नाही. शाळांमध्ये शिक्षकेतर कर्मचाऱ्यांची पदे मोठ्या प्रमाणात रिक्त आहेत. त्यामुळे शाळास्वच्छता, सॅनिटायझेशन व इतर कामे करणे शक्‍य नाही. त्यामुळे तातडीने शाळांमधील शिक्षकेतर कर्मचारी नेमावेत. 
- गोवर्धन पांडुळे, सचिव, महाराष्ट्र राज्य माध्यमिक शाळा शिक्षकेतर संघटना