नगर ः लाल टाकी परिसरातील जिल्हा परिषदेच्या मोकळ्या जागेवर उद्यान उभारण्याचा निर्णय अधिकारी- कर्मचाऱ्यांनी घेतला आहे. या परिसरात जिल्हा परिषदेचे अधिकारी- पदाधिकारी व कर्मचाऱ्यांची निवासस्थाने आहेत. उर्वरित मोकळ्या जागेवर बाग फुलविण्याचा संकल्प अधिकारी- कर्मचाऱ्यांनी सोडला आहे. हा संकल्प सिद्धीस नेण्यासाठी सर्वांनी एकदिलाने सुरवात केली असून, त्यासाठीचा सर्व खर्च लोकसहभागातून करण्यात येणार आहे.

शहरातील लाल टाकी परिसरातील मोक्‍याच्या ठिकाणी जिल्हा परिषदेची सव्वादोन एकर जागा आहे. त्यावर जिल्हा परिषद पदाधिकाऱ्यांची सहा, अधिकारी व कर्मचाऱ्यांची 22 आणि परिचर व वाहनचालकांची 24 निवासस्थाने आहेत. उर्वरित सव्वा एकर भूखंड मोकळा आहे.

हेही वाचा ः यंदा पुस्तकेच पहातायेत विद्यार्थ्यांची वाट

मुलांना खेळण्यासाठी ही मोठी जागा उपलब्ध आहे; मात्र बाग व चांगले मैदान नसल्याने अडचणी येतात. त्यामुळे या मोकळ्या भूखंडावर बाग विकसित केल्यास मुलांची मोठी सोय होणार आहे. शिवाय अधिकारी- कर्मचाऱ्यांसह त्यांच्या कुटुंबीयांना रात्री व पहाटेच्या वेळी फिरण्यासाठी चांगले वातावरण असेल, असा विचार अतिरिक्त मुख्य कार्यकारी अधिकारी जगन्नाथ भोर यांच्या मनात आला. त्यांनी हा विचार अधिकारी- कर्मचाऱ्यांसमोर मांडला. त्यास सर्वांनी होकार दिला. 

सर्वांनी एकत्र बसून बागेचे नियोजन केले. प्रत्येकावर जबाबदारी निश्‍चित करण्यात आली. ठरवून दिलेले काम करण्यासाठी प्रत्येकाने पावले टाकण्यास सुरवात केली आहे.

अवश्य वाचा ः नगरच्या संशोधकांचे "इस्त्रो'साठीचे उड्डाण रखडले या कारणाने 

बागेसाठी अंदाजे अडीच लाखांचा खर्च आहे. मात्र, त्याचा बोजा जिल्हा परिषदेवर न टाकता, लोकसहभागातून बाग विकसित करण्यात येणार आहे. प्रत्येक जण वेळ मिळेल तेव्हा येथे श्रमदान करणार आहे. या कामात सामान्य प्रशासनचे उपमुख्य कार्यकारी अधिकारी वासुदेव सोळंके, निखील पटारे, प्रदीप रोहकले, कल्याण शेळके अादींनी पुढाकार घेतला आहे.

अशी असेल बागेची रचना 
फुलांची झाडे, बसण्यासाठी बाके व मध्यभागी खेळण्यासाठी मैदान, अशी बागेची रचना आहे. बागेसाठी सगळेच आनंदाने कामाला लागले आहेत. त्यासाठी लहान-थोर श्रमदानही करीत आहेत.