अकोला : एमआयडीसी वाहतूक नगरातील एमआयडीसी प्रशासनाच्या ताब्यातील भूखंडाचे बनावट दस्तऐवज तयार करून विकणाऱ्या मो. इब्राहिम मो. अजीज (रा. मुजफ्फरनगर) नामक दलालाला एमआयडीसी पोलिसांनी मंगळवारी अटक केली. या भूखंड घोटाळ्यातील बनावट दस्तऐवज तयार करणारा ॲड. राजेश पांचोली आणि त्याचा भाऊ यांना रात्री उशीरा अटक करण्यात आली. 

प्राप्त माहितीनुसार, अकोला एमआयडीसी ट्रान्सपोर्ट नगरातील टीए ७८ भूखंडाचे बनावट कागदपत्रे बनवून, शासकीय प्लॉट विकण्यात आला होता. या भूखंडाचे बनावट कागदपत्रे ऑगस्ट २०१७ मध्ये तयार करून, डिसेंबर २०१७ मध्ये अमरावती येथील प्रादेशिक कार्यालयाला आग लावून पुरावे नष्ट करण्यात आले होते.

हेही वाचा - ‘आमच्या हातात गुजरात द्या, आम्ही अहमदाबाद चे नाव बदलवून दाखवतो, वाटल्यास तुमचं नाव देतो’

या प्रकरणाची तक्रार एमआयडीसी प्लॉट ऑनर असोसिएशनचे अध्यक्ष सुरेश काबरा यांनी मुख्य कार्यकारी अधिकारी एमआयडीसी मुंबई (अंधेरी) येथे केली होती. या तक्रारीची चौकशी करण्यासाठी एक समिती स्थापन करण्यात आली होती. त्यात दोषी आढळल्याने कारवाई करण्यात आली आहे.

मंगळवार, ता. ४ जानेवारी २०२१ रोजी अटक करण्यात आलेल्या मो.इब्राहिम मो.अजिज याला न्यायालयात हजर केले असता, त्याला एक दिवसाची पोलीस कोठडी सुनावण्यात आली आहे. या प्रकरणाचा तपास एमआयडीसी पोलिस ठाण्याचे ठाणेदार किशोर वानखडे यांच्या मार्गदर्शनाखाली पोलिस उपनिरीक्षक संजय सोनोने करीत आहेत.

हेही वाचा - अकोला जिल्ह्यातील बातम्यांसाठी क्लिक करा

चौकशीतून पितळ उघडे
चौकशीअंती या भूखंडावर बेकायदेशीर ताबा मिळवून, हा प्लॉट मौजी नामक उद्योजक यांना विकण्यात आला होता, अशी माहिती समोर आली होती. यावरून मुख्य कार्यकारी अधिकारी डॉ. पी. अन्बलगन यांनी अमरावती परिक्षेत्र अधिकारी यांना पोलिस ठाण्यात तक्रार दाखल करण्याचे आदेश दिले होते. मुख्य कार्यकारी अधिकारी यांच्या आदेशानुसार तक्रार देऊन, अकोला एमआयडीसी पोलिस ठाण्यात ३१ डिसेंबर २०१९ रोजी विविध कलमानुसार गुन्हा दाखल करण्यात आला होता.

हेही वाचा - औरंगाबादचं नामांतर: ठाकरे यांचा शिवसेनेसह मित्रपक्षांना टोला

दोषी कर्चमारी निलंबित
या प्रकरणात दोषी कर्मचारी अविनाश चंदन, पुरुषोत्तम पेठकर, एरिया मॅनेजर ठोके यांना निलंबित करण्याचे आदेश १४ फेब्रुवारी २०१९ रोजी देण्यात आले होते. त्यानुसार, या कर्मचाऱ्यांना निलंबित करण्यात आले होते. त्यानंतर ३१ डिसेंबर २०१९च्या रात्री १२.१० वाजताच्या सुमारास हे कर्मचारी आणि तत्कालीन प्रादेशिक अधिकारी कुंदा वासनिक व सेवानिवृत्त क्षेत्र व्यवस्थापक दिलीप झेंडूजी पाटील तसेच अकोला शहरातील व्यावसायिक विक्रम शहा यांच्या पत्नी कृपा शहा यांना अटक करण्यात आली होती. हे पाचही आरोपी जामिनावर आहेत.

(संपादन - विवेक मेतकर)