Akola News : फुटीनंतर जिल्ह्यात मुख्यमंत्री एकनाथ शिंदे व उद्धव बाळासाहेब ठाकरे अशा दोन गटात शिवसेना विखरुली गेली आहे. त्यात आता ठाकरे गटातील नाराज शिवसैनिक बाहेर पडण्याच्या मनःस्थितीत असून, माजी जिल्हाप्रमुखांसह काही पदाधिकाऱ्यांनी छत्रपती संभाजीनगर येथे मुख्यमंत्री एकनाथ शिंदे यांच्या गटातील नेत्यांची भेट घेतली.

छत्रपती संभाजी नगर येथील हॉटेल रामा इंटरनॅशनलमध्ये झालेल्या बैठकीला माजी जिल्हाप्रमुख श्रीरंग पिंजरकर, माजी उपजिल्हाप्रमुख तथा माजी जिल्हा परिषद सदस्य ज्ञानदेवराव परनाटे, माजी उपजिल्हाप्रमुख तथा माजी नगरसेवक, ठाकरे गटाचे शहर संघटक संतोष अनासाने, माजी उपजिल्हाप्रमुख तथा एसटी कामगार सेना प्रादेशिक सचिव अमरावती प्रदेश देविदास बोदडे, उपशहर प्रमख पपू चौधरी, राजेश मिसे, गौरव अग्रवाल आदी पदाधिकाऱ्यांची या बैठकीला उपस्थित होती. शिवसेनेचे युवा नेते खासदार डॉ. श्रीकांत शिंदे, शिवसेनेचे महाराष्ट्र राज्य समन्वयक रामेश्वर पवळ, प्रवक्ते नरेश म्हस्के, प्रदेश उपसचिव भाऊ चौधरी यांच्या उपस्थितीत ही बैठक पार पडली.

आमदार देशमुखांना मोठा धक्का

बाळापूर विधानसभा मतदारसंघाचे शिवसेनेचे आमदार नितीन देशमुख हे एकनाथ शिंदे यांच्यासोबत सुरत व येथून गुवाहटीला गेले होते. तेथून परत आल्यानंतर त्यांनी आपण उद्धव ठाकरे यांच्यासोबत असल्याचे जाहीर केले. त्यामुळे ते चांगलेच चर्चेत आले होते. त्यांच्याकडे जिल्हाप्रमुखपदही आहे. अशा परिस्थितीत शिवसेनेतील निष्ठावतांचा एक मोठा गट नाराज असल्याने शिंदे गटात जाण्याच्या तयारीत असल्याने आमदार देशमुख यांच्यासाठी हा मोठा धक्का मानला जात आहे.

बैठकीनंतर निर्णय

अकोल्यातील ठाकरे गटाचे नाराज नेते लवकरच मुंबई येथे मुख्यमंत्री एकनाथ शिंदे यांची भेट घेणार आहेत. या भेटीनंतर त्यांच्या शिंदे गटातील प्रवेशावर शिक्कामोर्तब होईल, अशी माहिती सूत्रांनी दिली.

आमदार म्हणतात कुणीही जाणार नाही!

शिवसेना ठाकरे गटातील नाराज पदाधिकाऱ्यांच्या एका गटाने खासदार श्रीकांत शिंदे यांची भेट घेतली. ते शिंदे गटात जाणार असल्याची चर्चा आहे. असे असले तरी जिल्हा प्रमुखाची जबाबदारी असलेले आमदार नितीन देशमुख यांनी कुणीही नाराज नसून, कुणीही कुठेही जाणार नसल्याचा दावा केला आहे.