Adani Group Share Crash : अदानी समूहाबाबत हिंडेनबर्ग रिसर्चच्या अहवालामुळे देशातील सर्वात मोठी विमा कंपनी एलआयसीला 18,300 कोटी रुपयांचा तोटा झाला आहे.

हिंडेनबर्गच्या अहवालानंतर अदानी समूहाच्या शेअर्समध्ये 25 टक्क्यांपर्यंत मोठी घसरण नोंदवली गेली. आयुर्विमा महामंडळाने अदानी समूहाच्या सात कंपन्यांमध्ये गुंतवणूक केली आहे.

एलआयसीच्या गुंतवणुकीच्या मूल्यात गेल्या दोन व्यापार सत्रांमध्ये 18,300 कोटी रुपयांची घट झाली आहे. यादरम्यान अदानी समूहाच्या गुंतवणूकदारांचे 4 लाख कोटींहून अधिक रुपये बुडाले आहेत.

अदानी टोटल गॅसमध्ये एलआयसीला सर्वाधिक फटका बसला आहे. कंपनीची गुंतवणूक 6350 कोटींनी कमी झाली आहे.

एलआयसीला कोणत्या कंपनीचे किती नुकसान झाले?

अदानी एंटरप्रायझेसच्या गुंतवणुकीत LIC ला 2700 कोटींचे नुकसान झाले आहे. अदानी ग्रीनमध्ये 875 कोटी, अदानी ट्रान्समिशनमध्ये 3050 कोटी, अदानी पोर्टमध्ये 3300 कोटी, एसीसीमध्ये 570 कोटी, अंबुजा सिमेंटमध्ये 1460 कोटी. या कंपन्यांचे एकूण 18305 कोटींचे नुकसान झाले आहे.

एलआयसीकडे अदानी एंटरप्रायझेसमध्ये 4.23 टक्के, अदानी पोर्टमध्ये 9.14 टक्के, अदानी टोटल गॅसमध्ये 5.96 टक्के, अदानी ट्रान्समिशनमध्ये 3.65 टक्के, अदानी ग्रीन गॅसमध्ये 1.28 टक्के, एसीसीमध्ये 6.41 टक्के आणि अंबुजा सिमेंटमध्ये 6.32 टक्के आहेत.

हेही वाचा : ...इथं बनतो आपला लाडका तिरंगा

24 जानेवारी रोजी अदानी समूहातील एलआयसीच्या एकूण गुंतवणुकीचे मूल्य 81 हजार कोटींच्या पुढे होते. या आठवड्यात अदानी पोर्टचे शेअर्स एकूण 15 टक्क्यांनी आणि अदानी एंटरप्रायझेसचे शेअर्स सुमारे 19 टक्क्यांनी घसरले आहेत.

सार्वजनिक क्षेत्रातील बँकांनी जास्त कर्ज दिले :

ब्रोकरेज फर्म CLSA च्या अहवालानुसार, अदानी समूहाकडे भारतीय बँकिंग क्षेत्राचे एक्सपोजर 0.55 टक्के आहे. खासगी बँकांपेक्षा सार्वजनिक क्षेत्रातील बँकांनी अदानी समूहाला जास्त कर्ज दिले आहे. PSU बँकांचे एकूण एक्सपोजर 0.60 टक्के आहे.

तज्ञांच्या मते, अदानी समूहावर सुमारे 1.9 लाख कोटींचे कर्ज आहे. एकूण कर्जामध्ये बँकांचे कर्ज सुमारे 80 हजार कोटी आहे. ते सुमारे 40 टक्के आहे.

गेल्या तीन वर्षांत कंपनीचे कर्ज दुप्पट वाढले आहे. समूहाच्या बँक कर्जामध्ये सार्वजनिक क्षेत्रातील बँकांचा वाटा 25-30 टक्के आहे, तर खाजगी बँकांचा वाटा 10 टक्के आहे. एकूण कर्जामध्ये विदेशी बँकांचा वाटा 18 टक्के आहे.