शेअर बाजारात चांगल्या स्टॉक्समध्ये पैसे गुंतवल्यास कमी कालावधीत दमदार नफा कमावता येतो. पण त्यासाठी चांगल्या फंडामेंटल्स असणाऱ्या शेअर्समध्ये पैसे गुंतवणे गरजेचे आहे. गेल्या काही दिवसांत शेअर बाजारात मोठी उलथापालथ सुरु आहे,  गेल्या ट्रेडिंग आठवड्यात तर देशांतर्गत इक्विटी बेंचमार्क निर्देशांक 1 टक्क्यांहून अधिक घसरला, पण अशात आघाडीच्या बिगर बँकिंग फायनांशियल कंपनी (NBFC) बजाज फायनान्सच्या (Bajaj Finance) शेअर्सने चांगली कामगिरी केल्याचे समोर आले आहे.

गेल्या वर्षभराबद्दल बोलायचे झाले तर बजाज फायनान्सचे शेअर्स तीन टक्क्यांहून अधिक कमकुवत झाले आहेत, म्हणजेच त्यात चढ-उतार दिसून येत आहे. पण, जर आपण लाँग टर्मचा विचार केल्यास हा स्टॉक मल्टीबॅगर असल्याचे सिद्ध झाले आहे. बजाज फायनान्सने 24 वर्षात गुंतवणूकदारांचा पैसा 3681 पट वाढवला आहे.

एक लाखाचे 37 कोटी

18 एप्रिल 1996 रोजी बजाज फायनान्सच्य शेअर्सची किंमत 5.78 रुपयांवर होती, जी 21 ऑगस्ट 1998 रोजी दोन वर्षांनी 2.04 रुपयांवर गेली. पण 22 वर्षांनंतर, 23 सप्टेंबर 2022 रोजी त्याची किंमत बीएसईवर 7,509 रुपये झाली.

म्हणजेच एखाद्या गुंतवणूकदाराने 21 ऑगस्ट 1998 रोजी त्यात 1 लाख रुपयांची गुंतवणूक केली असती तर ती आतापर्यंत 3681 पटीने वाढून सुमारे 37 कोटी रुपये झाली असती. मागच्या पाच वर्षांचा विचार केला तर या शेअरने गुंतवणूकदारांना 309 टक्के परतावा दिला आहे.

बजाज फायनान्स ही बजाज फिनसर्व्हची  (Bajaj Finserv) उपकंपनी आहे. ही कंपनी प्रामुख्याने दुचाकी आणि तीनचाकी वाहनांना कर्ज देण्यासाठी सुरू करण्यात आली होती. आधीचे नाव बजाज ऑटो फायनान्स होते जे 2010 मध्ये बदलून बजाज फायनान्स झाले. बजाज फायनान्स आरबीएल बँक आणि डीबीएस बँक यांच्या संयुक्त विद्यमाने को-ब्रँडेड क्रेडिट कार्ड जारी करते.

नोंद : क्रिप्टो मार्केट, शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्याप्रमाणे नुकसान होण्याचीही शक्यता असते. त्यामुळे क्रिप्टो, शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.