नवी दिल्ली : विदेशी बाजारात अमेरिकन डॉलरच्या मजबुतीमुळे भारतीय चलनाची मोठी पडझड झाली आहे. सोमवारच्या सुरूवातीच्या सत्रात भारतीय चलन 52 पैशांनी घसरून तुलनेत अमेरिकन डॉलरची किंमत 77.42 वर पोहोचली आहे. ही आत्तापर्यंतची भारतीय चलनाची सर्वांत मोठी घसरण आहे.

(Indian Rupee Weakened Hit all Time Low Today)

परकीय चलन बाजारात, अमेरिकन डॉलरच्या तुलनेत रुपया 77.17 वर उघडला होता आणि नंतर 77.42 पर्यंत घसरला, मागील बंद किंमतीच्या तुलनेत 52 पैशांची घसरण झाली आहे. शुक्रवारी अमेरिकन डॉलरच्या तुलनेत रुपया पुन्हा 55 पैशांनी घसरून 76.90 वर बंद झाला.

चलनवाढीच्या चिंतेमुळे गुंतवणूकदार जोखीम पत्करत नसल्याचं विदेशी चलन व्यापार्‍यांनी सांगितलं आहे. दरम्यान, सहा प्रमुख चलनांच्या तुलनेत अमेरिकन डॉलरची स्थिती दर्शवणारा निर्देशांक 0.35 टक्क्यांनी वाढून 104.02 वर पोहोचला आहे.

जागतिक बाजारात इंधनाचे भाव सतत वाढत असून ते आता 0.14 टक्क्यांनी वाढून $112.55 प्रति बॅरल झाले. शेअर बाजाराच्या तात्पुरत्या आकडेवारीनुसार, परदेशी संस्थागत गुंतवणूकदारांनी शुक्रवारी निव्वळ 5,517.08 कोटी रुपयांच्या समभागांची विक्री केली.