जळगाव : आगामी काही दिवसातील रक्षाबंधन, हरतालिका यासह विविध सणांच्या पार्श्वभूमीवर सुवर्ण बाजारात तेजी येत आहे. पंधरा दिवसांपूर्वी ५७ हजार रुपये प्रतिकिलो असलेली चांदी शनिवारी (ता. ६) साठ हजारांपर्यंत गेली आहे. तर सोन्याचे दर ५० हजार ७०० प्रतितोळा होते. आज त्यातही १४०० रुपयांची वाढ झाली आहे. (Latest Marathi News)

आषाढी एकादशीनंतर लग्नसराई बंद झाल्याने सोने, चांदीला हौसेखातर घेणाऱ्या व्यतिरिक्त मागणी नव्हती. यामुळे सोने, चांदी बाजारात शांतता होती. जुलैत चांदीच्या दरात साडेपाच हजारांची तर सोन्याच्या दरात पाचशे रूपयांची घसरण झाली होती. २२ जूनला चांदीचा दर ६२ हजार ५०० रूपये प्रतिकिलो होता. शनिवारी चांदी ५७ हजार प्रतिकिलो आहे. तर सोन्याचा दर २२ जूनला ५१ हजार होता.

२० जूनला सोन्याचा दर ५० हजार ७०० होता. २२ जुलैला ५९ हजारांचा दर असलेल्या चांदीच्या दरात चक्क दोन हजारांची घसरण होऊन ते ५७ हजार प्रतिकिलोवर स्थिरावत आहेत. यामुळे अनेक गुंतवणूकदारांनी सोने चांदीच्या दरात गुंतवणूक करीत सोने, चांदीची खरेदी केली. रशिया व युक्रेनमधील युद्धामुळे फेब्रुवारीत सोने, चांदीच्या दरात सातत्याने ८ मार्चपर्यंत वाढ होत गेली. नंतर मात्र युद्धात शिथिलता येताच सोने, चांदीच्या दरात घसरण सुरू झाली होती. यंदाही आषाढी एकादशीनंतर सोने, चांदीच्या दरात घसरण झाली. गेल्या पंधरवड्यात मात्र या दरात वाढ झाल्याने सोने, चांदीला झळाळी येत आहे.

सोने, चांदीचे दर असे (जीएसटी विना)

तारीख--सोने (प्रतितोळे)--चांदी (प्रतिकिलो)

१५ जुलै--५० हजार ७००--५७ हजार

२० जुलै--५० हजार ७००--५७ हजार

२८ जुलै--५१ हजार--५६ हजार

२९ जुलै--५१ हजार ८०० --५९ हजार

३० जुलै--५१ हजार ९००--६० हजार

२ ऑगस्ट--५२ हजार ४००--६० हजार

६ ऑगस्ट--५२ हजार ४००--६० हजार