चंदीगड : पंजाबमधील गडशंकर (Punjab Garhshankar) इथं काल रात्री उशिरा झालेल्या एका रस्ता अपघातात (Road Accident) आठ भाविकांचा मृत्यू झाला, तर अनेक जण जखमी झाले आहेत.

पोलिसांकडून (Police) मिळालेल्या माहितीनुसार, बुधवारी रात्री उशिरा सुमारे 50 भाविक बैसाखी मेळाव्यात सहभागी होण्यासाठी चरण छो गंगेच्या दिशेनं चालले होते. दरम्यान, भरधाव वेगात आलेल्या ट्रकनं त्यांना चिरडलं. या अपघातात पाच भाविकांचा जागीच मृत्यू झाला तर तीन जणांचा रुग्णालयात उपचारादरम्यान मृत्यू झाला.

मिळालेल्या माहितीनुसार, पाच भाविक एकाच कुटुंबातील असल्याचं सांगण्यात येत आहे. सर्व मृत भाविक उत्तर प्रदेशातील मुझफ्फरनगर येथील आहेत. अपघातानंतर ट्रकचालक घटनास्थळावरून फरार झाला असून पोलीस त्याचा शोध घेत आहेत.

विशेष म्हणजे, बुधवारीच पंजाबमधील गडशंकर भागातील गढी मनोस्वालजवळ ट्रॅक्टर-ट्रॉली पलटी होऊन तीन जणांचा मृत्यू झाला होता, तर 10 जण जखमी झाले होते. गडशंकर उपविभागातील श्री खुरालगड साहिब इथं बैसाखीनिमित्त लंगरचं आयोजन करण्यासाठी जात असताना ही घटना घडली.