WorldCup: फटाक्यांचा आवाज सहन न झाल्याने एका घोड्याचा हृदयविकाराच्या झटक्याने रविवारी (ता.५) रात्री मृत्यू झाला. आयसीसी क्रिकेट विश्‍वकरंडक स्पर्धेत दक्षिण आफ्रिकेवर भारताने मोठ्या फरकाने विजय मिळविल्यानंतर येथील इडन गार्डन स्टेडिअममध्ये फटाके फोडण्यात आले त्यावेळी ही घटना घडली.

क्रिकेट सामन्यावेळी इडन गार्डन येथील बंगाल क्रिकेट संघटना (सीएबी) क्लबच्या बाहेर सुरक्षेसाठी काही घोडेस्वार पोलिस तैनात होते. भारताने सामना जिंकल्यानंतर स्टेडिअमवर एकामागून एक फटाके फुटत असतानाच पोलिसांचे सात ते आठ घोडे बिथरले. त्यांनी पळण्यास सुरुवात केली. त्यांच्यावर बसलेले काही पोलिसही खाली पडले. गर्दीतही पळापळ झाली. यात दोन पोलिसांसह चारजण जखमी झाले.

या गोंधळात एका घोड्याला हृदयविकाराचा झटका येऊन त्याचा मृत्यू झाला तर काही घोडे जखमी झाले. बंगालमध्ये दुर्गापूजा उत्सवाच्या आधी राज्य सरकारने फटाक्यांच्या आवाजाचा मर्यादा ९० डेसिबलवरून १२५ डेसिबलपर्यंत वाढवली होती. १२५ डेसिबलपर्यंत आवाजाच्या फटाक्यांच्या विक्रीला परवानगी देण्यात आली होती.