Mahua Moitra: चांद्रयान-3 च्या यशाने, जगभरात भारताचे कौतुक होत आहे. त्यात तृणमूल काँग्रेसच्या (TMC) खासदार महुआ मोईत्रा यांनी रविवारी (दि. 27 ऑगस्ट) इस्रोच्या चांद्रयान-3 मोहिमेवर भाष्य करत असताना गौतम अदानी आणि पंतप्रधान नरेंद्र मोदींना टोला लगावला आहे.

महुआ मोईत्रा ट्विट करत म्हणाल्या की, ''मोदीजींनी चंद्राच्या काही भागांना तिरंगा आणि शिवशक्ती असे नाव दिले आहे. अदानी आता चंद्राच्या रिअल इस्टेट क्षेत्रात प्रवेश करतील, चंद्रावर फ्लॅट बांधण्यासाठी निविदा न काढता जागा मिळवतील. मुस्लिमांना तिथे राहण्यास परवानगी नसेल. फक्त शुद्ध शाकाहारी रहिवासी तिथे राहतील.''

शनिवारी (दि. 26 ऑगस्ट) पंतप्रधान नरेंद्र मोदी ग्रीसचा दौरा संपवून थेट बंगळुरू येथे चांद्रयान 3 साठी काम करणाऱ्या इस्रोच्या अधिकाऱ्यांची भेट घेण्यासाठी आले.

हिंदुस्तान एरोस्पेस लिमिटेड येथील विमानतळावर लोकांना संबोधित करत असताना पंतप्रधान मोदी म्हणाले, “चांद्रयान-3 चंद्रावर लँड होताच मला खूपच आनंद झाला. मी त्यावेळी भारतात नव्हतो. त्यामुळेच भारतात गेल्यानंतर सर्वात आधी बंगळुरू येथे जाऊन इस्रोच्या वैज्ञानिकांना भेटावे, असे मी ठरवले.”

पंतप्रधान मोदींनी बंगळुरूमध्ये इस्रोच्या वैज्ञानिकांची भेट घेतली. त्यावेळी बोलताना त्यांनी मोठी घोषणा केली. चांद्रयान-3 चंद्रावर ज्याठिकाणी लँड झालं, त्या ठिकाणाला आता 'शिवशक्ती पॉइंट' असं नाव दिलं जाणार आहे. यासोबतच, चांद्रयान-2 मधील लँडर ज्याठिकाणी क्रॅश झालं, त्या ठिकाणाला 'तिरंगा' म्हटलं जाणार आहे.