डेहराडून : उत्तर प्रदेशातील योगी सरकारप्रमाणंच (Yogi Government) आता उत्तराखंडचे पुष्कर सिंह धामी (CM Pushkar Singh Dhami) सरकारही राज्यातील मान्यताप्राप्त मदरशांचं (Madrasa) सर्वेक्षण करणार आहे. उत्तराखंड वक्फ बोर्डाचे (Uttarakhand Waqf Board) अध्यक्ष शादाब शम्स यांनी याला दुजोरा दिलाय.

दरम्यान, आजपासून उत्तर प्रदेशात अनोळखी मदरशांच्या सर्वेक्षणाचं काम सुरू झालंय. त्याच धर्तीवर उत्तराखंड सरकारनंही हा निर्णय घेतलाय. उत्तराखंड वक्फ बोर्डाचे अध्यक्ष शादाब शम्स (Shadab Shams) म्हणाले, 'सरकार ज्या मदरशांना पैसं देतं, त्यांची चौकशी करण्याचा अधिकार सरकारला आहे. त्या मदरशांचं सर्वेक्षण करणं हाही त्याचाच एक भाग आहे. सरकारच्या पैशातून मुस्लिम विद्यार्थ्यांना मदरशांमध्ये शिक्षण, भोजन आणि इतर सुविधा मिळतात की नाही? मदरशांमध्ये शिक्षक आहेत का? मदरशांना इमारती आहेत की नाही? याचं सर्वेक्षण केलं जाणार आहे.'

103 मदरशांचं होणार सर्वेक्षण

शम्स पुढं म्हणाले, संपूर्ण राज्यात 500 हून अधिक मदरसे कार्यरत आहेत. त्यापैकी 103 मदरसे वक्फ बोर्ड अंतर्गत येतात. या मदरशांना सरकारकडून पैसा दिला जातो. याअंतर्गत वक्फ बोर्ड उत्तराखंडमधील आपल्या सर्व 103 मदरशांचं सर्वेक्षण करणार असून त्यामध्ये राज्य सरकारच्या सर्व सुविधा कशा वापरल्या जात आहेत, याची चौकशी केली जाणार आहे.