अहमदाबाद : राज्यसभा निवडणुकीत पक्षाचे उमेदवार अहमद पटेल यांच्या विरोधात मतदान केल्यामुळे पक्षातून हकालपट्टी करण्यात आलेल्या काँग्रेसच्या गुजरातमधील सात आमदारांनी विधानसभा सदस्यत्वाचा राजीनामा दिल्याची माहिती विधानसभा अध्यक्ष रमणलाल व्होरा यांनी आज दिली.

गुजरातमधील असंतुष्ट आमदारांवर कारवाई करताना काँग्रेसने 9 ऑगस्टला शंकरसिंह वाघेला आणि सात आमदारांची पक्षातून सहा वर्षांसाठी हकालपट्टी केली होती. 8 ऑगस्टला झालेल्या राज्यसभा निवडणुकीत या सर्वांना क्रॉस वोटिंग केले होते. शंकरसिंह वाघेला वगळता सात आमदारांनी काल रात्री माझ्या निवासस्थानी त्यांचे राजीनामे सादर केल्याचे व्होरा यांनी सांगितले. यामध्ये वाघेला यांचा मुलगा महेंद्रसिंह यांचाही समावेश आहे.

राघवजी पटेल आणि भोलाभाई गोहेल या दोन बंडखोर आमदारांनीही त्यांचे राजीनामे सादर केले. या दोघांची मते निवडणूक आयोगाने बाद ठरवली होती. राजीनामे सादर केलेल्या अन्य आमदारांमध्ये अमित चौधरी, सी. के. राऊलजी, धर्मेंद्रसिंह जडेजा आणि करमसिंह पटेल यांचा समावेश आहे.