Sonia Gandhi Retirement : छत्तीसगडच्या रायपूर (Raipur) इथं सुरु असलेल्या काँग्रेस (Congress) अधिवेशनात पक्षाच्या माजी अध्यक्षा सोनिया गांधी यांनी भावूक भाषण केलं.

सोनिया गांधींनी 1998 ला काँग्रेसचं अध्यक्षपद स्वीकारल्यापासून ते आतापर्यंतचा आपला राजकीय प्रवास उलगडला. यावेळी त्यांनी आपल्या सहकाऱ्यांचंही आभार मानलं. मात्र, सोनिया गांधींनी यावेळी केलेल्या भाषणामुळं त्या सक्रीय राजकारणातून संन्यास घेणार असल्याची चर्चा रंगलीये.

दरम्यान, पक्षाच्या प्रवक्त्या अलका लांबा (Alka Lamba) यांनी सोनिया गांधींच्या वक्तव्याबाबत स्पष्टीकरण दिलंय. रायपूरच्या अधिवेशनात बोलताना लांबा म्हणाल्या, 'मला सोनिया गांधींसोबत 2 मिनिटं बोलण्याची संधी मिळाली. त्यावेळी मी त्यांना म्हणाले, मॅडम.. तुमच्या कालच्या भाषणातून तुम्ही राजकारणातून निवृत्ती घेताय असं समजतं. परंतु, मला सांगायला आनंद होत आहे की, सोनियाजींनी भविष्यातही आम्हाला त्यांचे आशीर्वाद आणि मार्गदर्शन मिळणार असल्याचं सांगितलं. त्यामुळं सोनिया गांधी राजकारणातून इतक्यात निवृत्त होणार नाहीत, असंही त्यांनी स्पष्ट केलं.

सोनिया गांधींनी आपल्या भाषणात सांगितलं की, 1998 मध्ये काँग्रेस अध्यक्षपद घेतल्यापासून ते आतापर्यंतच्या 25 वर्षात आपण अनेक गोष्टी मिळवल्या असून, काही निराशाजनक गोष्टीही झाल्या. सोनिया गांधींनी यावेळी 2004 आणि 2009 लोकसभा निवडणुकीत मनमोहन सिंग यांच्या नेतृत्वात मिळालेला विजय हे पक्षाचं सर्वात मोठं यश होतं, असं सांगितलं. भारत जोडो यात्रा सध्या महत्त्वाच्या टप्प्यावर असून त्याच्यासह माझी इनिंग संपत आहे याचा मला फार आनंद आहे, असं सोनिया गांधी म्हणाल्या. त्यामुळं त्या राजकारणातून संन्यास घेणार असल्याची चर्चा रंगली होती. आता यावर प्रवक्त्या अलका लांबा यांनी स्पष्टीकरण दिलंय.