Amit Shah's Bold Statement in Rajya Sabha: संसदेच्या पावसाळी अधिवेशन सध्या सुरू आहे आणि यामध्ये ऑपरेशन सिंदूरच्या मुद्य्यावर चर्चा सुरू आहे. मात्र चर्चा केवळ चर्चा न राहता यावरून जोरदार गदारोळ सुरू असल्याचं दिसत आहे.

या दरम्यान आज(बुधवार) गृहमंत्री अमित शहा यांनी राज्यसभेत ऑपरेशन सिंदूरवर विरोधकांच्या प्रश्नांची उत्तरे दिली. तसेच, यावेळी विरोधकांना त्यांनी एक आव्हानही केल्याचं दिसून आलं, ज्याची सध्या मीडियावर चर्चा सुरू आहे.

गृहमंत्री  अमित शाह यांच्या भाषणादरम्यान विरोधी पक्षाचे खासदार पंतप्रधान मोदींकडून उत्तर मागत होते. अनेक विरोधी सदस्य या मागणीसह सतत घोषणाबाजी करत होते. यावेळी अमित शाह यांनी त्यांना उद्देशून म्हटले की, माझ्याशी तर निपटा, तुम्ही पंतप्रधानांना का बोलावताय. आणखी त्रास होईल... यांना समजतच नाहीए. ’’

अमित शाह यांच्या भाषणादरम्यान बरीच घोषणाबाजी झाली. यावेळी काँग्रेस अध्यक्ष मल्लिकार्जुन खरगे म्हणाले की, ‘’ऑपरेशन सिंदूरवर १६ तास चर्चा झाली. आम्ही अनेक प्रश्न उपस्थित केले, ज्यांची उत्तरे मिळाली नाहीत. ते म्हणाले की पंतप्रधानांनी राज्यसभेत त्यांचे विचार मांडावेत. पंतप्रधान येथे न येणे हा सभागृहाचा अपमान आहे.’’

याशिवाय अमित शहांच्या भाषणादरम्यान विरोधी सदस्यांनी सभागृहातून सभात्याग केला. त्यानंतर अमित शहांनी ऑपरेशन सिंदूर तसेच ऑपरेशन महादेव यावर आपले मत व्यक्त केले. तसेच, अमित शहा म्हणाले की विरोधी पक्षाची मागणी आणि भूमिका दोन्ही योग्य नाहीत.  तर विरोधी पक्षाच्या सभात्यागावर अमित शहा म्हणाले, ते का जात आहेत हे मला माहिती आहे? बहुतेक महत्त्वाच्या मुद्द्यांवर तर, काँग्रेस पक्ष त्यांच्या विरोधी पक्षनेत्याला बोलू देत नाही आणि आता ते पंतप्रधान उत्तर देत नाहीत असा मुद्दा उपस्थित करत आहेत.