बागेश्वर धाम (Bageshwar Dham) सरकारचे पंडित धीरेंद्र कृष्ण शास्त्री (Dhirendra Krishna Shastri) यांनी पुन्हा एकदा भारत लवकरच हिंदू राष्ट्र (Hindu Rashtra) होणार असल्याचा दावा केलाय.

'एएनआय' वृत्तसंस्थेशी बोलताना शास्त्री म्हणाले, 'भारत लवकरच हिंदू राष्ट्र होईल. आज आमच्या दरबारात परदेशातूनही लोक सहभागी होत आहेत. ते ख्रिश्चन धर्माचे असले तरी, सनातन धर्मावर त्यांचा विश्वास आहे.'

धीरेंद्र शास्त्री पुढं म्हणाले, 'याचा अर्थ असा की, परदेशी लोकांनाही असा भारत हवाय, जिथं प्रत्येकजण अभिमानानं हिंदुत्वाची चर्चा करू शकेल. जातीभेदाकडं दुर्लक्ष करा. कारण, आम्ही सगळे भारतीय आहोत. हिंदुस्थान म्हणजेच हिंदूंचं स्थान, असंही त्यांनी स्पष्ट केलं.

सत्ता मिळवून सरकार बनवणं हे आमचं उद्दिष्ट नाहीये. पण, जर कोणी आम्हाला पाठिंबा देऊ इच्छित असेल तर त्यांचं स्वागत आहे. आम्ही सर्व हिंदूंनी आम्हाला पाठिंबा द्यावा, अशी विनंती करतो. भारत लवकरच हिंदू राष्ट्र होईल, असंही शास्त्री म्हणाले. नागपुरात आयोजित एका कार्यक्रमात महाराष्ट्रातील एका संस्थेनं धीरेंद्र शास्त्रींना चमत्कार दाखविण्याचं आव्हान दिलं होतं. तेव्हापासून शास्त्री सतत चर्चेत असतात.