Bihar Murder News: पाटण्यातून धक्कादायक बातमी समोर आली आहे. जनता दल युनायटेड (JDU) चे युवा नेते सौरभ यांची पाटणा येथील पुनपुन येथे गोळ्या झाडून हत्या करण्यात आली आहे. पुनपुन येथील कारपेंटर्स कॉर्नर येथे लग्न समारंभ आटोपून परतत असताना रात्री उशिरा सौरभ यांची गोळ्या झाडून हत्या करण्यात आली. यानंतर संतप्त समर्थकांनी पाटणा-गया येथे रस्ता रोखून धरला. आरोपींची ओळख पटवण्यात पोलिसांना अद्याप यश आलेले नाही.

इंडिया टुडेच्या वृत्तानुसार, बिहारमधील जनता दल युनायटेड (जेडीयू) च्या तरुण नेत्याची बुधवारी रात्री पाटणा येथे अज्ञात हल्लेखोरांनी गोळ्या झाडून हत्या केली. रात्री उशिरा सौरभ कुमार आपल्या मित्र आणि कुटुंबासह लग्न समारंभातून परतत असताना दुचाकीवरून आलेल्या चार हल्लेखोरांनी त्यांच्यावर गोळीबार केला.

जखमी व्यक्तीला रुग्णालयात केलं दाखल

एसपी भरत सोनी यांनी दिलेल्या माहितीनुसार, "लग्न समारंभातून परत येताच मोटरसायकलवरून आलेल्या हल्लेखोरांनी सौरभ कुमार यांच्यावर गोळीबार केला. या घटनेत आणखी एक जण जखमी झाल्याची माहिती आहे. जखमीवर रुग्णालयात उपचार सुरू आहेत.

डोक्यात आणि मानेला लागली गोळी

पोलिसांनी दिलेल्या माहितीनुसार, या जीवघेण्या हल्ल्यात जेडीयू नेते सौरभ कुमार यांच्या डोक्यात आणि मानेवर गोळ्या लागल्या आहेत. गोळी लागल्यानंतर त्याचा जागीच मृत्यू झाला. हल्लेखोरांपर्यंत पोहोचण्यासाठी पोलीस सीसीटीव्ही फुटेज तपासत आहेत. एसपी भारत सोनी म्हणाले की, ते राजकारण आणि व्यावसायिक संबंधांसह सर्व बाजूंनी तपास करत आहेत.

सौरभ कुमार यांच्यावर हल्ला झाल्यानंतर जनता दल युनायटेडचे ​​संतप्त समर्थक घटनास्थळी जमा झाले. हत्येप्रकरणी प्रशासनाकडून कठोर आणि त्वरित कारवाईची मागणी जेडीयू कार्यकर्त्यांनी केली आहे. पोलिसांनी लवकरात लवकर मारेकऱ्यांना अटक करून तपास पुर्ण करावा अशी मागणी करण्यात येत आहे.