भाजपने नुपूर शर्मा आणि नवीन जिंदाल यांच्या विरोधात मोठी कारवाई केली आहे. या दोघांना पक्षातून निलंबित करण्यात आले आहे. भाजप प्रवक्त्या नुपूर शर्मा यांनी प्रेषित महंमद पैगंबर यांच्याबद्दल काढलेल्या अनुद्गार प्रकरणी भाजपने मोठी कारवाई केली आहे. कोणत्याही धर्माचा किंवा धार्मिक व्यक्तीचा अपमान भाजप निंदनीय मानतो, अशा शब्दांत भाजपने शर्मा यांची पाठराखण करण्याचे साफ टाळले होते. त्यानंतर ही कारवाई करत त्यांना पक्षातून निलंबित करण्यात आले आहे.

दरम्यान नविन जिंदाल हे भाजपचे मीडिया प्रभारी आहेत त्यांच्यावर देखील कारवाई करण्यात आली आहे. या दोघांनाही ६ वर्षांसाठी पक्षातून निलंबित करण्यात आले आहे. एका टिव्ही शो मध्ये बोलत असताना भाजप प्रवक्ता नुपूर शर्मा यांनी प्रेषित महंमद पैगंबर यांच्याबाबत आक्षेपार्ह वक्तव्य केलं होतं त्यानंतर पक्षाकडून ही कारवाई करण्यात आली आहे.

भाजप राष्ट्रीय मुख्यालयाच्या प्रमुख अरुण सिंह यांनी आज याबाबत पक्षाची भूमिका स्पष्ट करणारे निवेदन दिले होतो. यामध्ये शर्मा यांच्याबाबतच्या वादापासून पक्षाने हात झटकत भाजप धार्मिक एकतेवर विश्वास ठेवतो. कोणत्याही धर्मातील पूजनीय व्यक्तींचा अपमान भाजपला मान्य नाही असे म्हटले आहे. तसेच कोणत्याही धर्म किंवा संप्रदायाच्या भावना दुखावणारी वक्तव्ये-विचार भाजपला मान्य नाहीत. असे विचार निंदनीय आहेत. भारताच्या हजारो वर्षांच्या इतिहासात प्रत्येक धर्म या मातीत रूजला व वाढला आहे. भाजप प्रत्येक धर्माचा सन्मान करतो.