गुजरातमधील मोरबी येथे मच्छू नदीवरील केबल पूल तुटल्याने मोठी दुर्घटना घडली आहे. या घटनेत अनेक जण नदीत पडले. घटनेची माहिती मिळताच पोलीस आणि प्रशासनाचे पथक घटनास्थळी पोहोचले आणि बचावकार्य सुरू केले.

अपघाताच्या वेळी पुलावर सुमारे 400 ते 500 लोक उपस्थित होते, असे सांगण्यात येत आहे. हा पूल खूप जुना असून काही दिवसांपूर्वीच त्याची दुरुस्ती करण्यात आली होती. 5 दिवसांपूर्वी ते सर्वसामान्यांसाठी पुन्हा खुला करण्यात आला होता.

बचाव पथकाने अनेकांना नदीतून वाचवले असून त्यांना रुग्णालयात पाठवले आहे. इतर लोकांचाही शोध सुरू आहे. सर्व लोकांना लवकरात लवकर नदीतून बाहेर काढण्याचे प्रयत्न सुरू आहेत. आज सुट्टीचा दिवस असल्याने इथे खूप गर्दी होती.

या अपघातानंतर गुजरातचे मुख्यमंत्री भूपेंद्र पटेल यांनी ट्विट केले की, मोरबीमध्ये केबल पूल कोसळण्याच्या दुर्घटनेने मला खूप दुःख झाले आहे. मदत आणि बचाव कार्य सुरू आहे.जखमींवर तातडीने उपचार करण्याची व्यवस्था करण्याच्या सूचना देण्यात आल्या आहेत.याबाबत मी जिल्हा प्रशासनाच्या सतत संपर्कात आहे.

त्याचवेळी, पंतप्रधान कार्यालयाने सांगितले की, पंतप्रधान नरेंद्र मोदी यांनी मोरबी येथील अपघाताबाबत गुजरातचे मुख्यमंत्री आणि इतर अधिकाऱ्यांशी चर्चा केली. त्यांनी बचाव कार्यासाठी तात्काळ पथके जमवावीत, परिस्थितीवर बारकाईने आणि सतत लक्ष ठेवावे आणि बाधित लोकांना शक्य ती सर्व मदत करावी असे सांगितले आहे.