नवी दिल्ली : पाणबुडीशी संबंधित डेटा उघड केल्याप्रकरणी केंद्रीय अन्वेषण विभागाने (सीबीआय) नौदलाच्या (Navy) कमांडर दर्जाच्या अधिकाऱ्यासह (cbi arrests) दोन निवृत्त कर्मचारी आणि अन्य दोघाजणांना अटक केली आहे. याप्रकरणी अटक करण्यात आलेल्या अधिकाऱ्याचे नाव उघड करायला केंद्रीय तपास संस्थेने नकार दिला आहे. याप्रकरणी मागील महिन्यामध्ये कारवाईला सुरूवात झाली होती

तब्बल १९ ठिकाणांवर छापे

हे प्रकरण भारतीय नौदलाच्या ताफ्यात समाविष्ट झालेल्या किलो श्रेणीतील पाणबुडीशी संबंधित असल्याचे अधिकाऱ्यांकडून सांगण्यात आले. याप्रकरणी दिल्ली, मुंबई, नोएडा आणि हैदराबादेतील तब्बल १९ ठिकाणांवर छापे टाकण्यात आले असून अनेक लोकांची चौकशी करण्यात आली आहे. याप्रकरणात गोळा करण्यात आलेल्या डिजिटल पुराव्यांचीही तपास संस्थेकडून पडताळणी करण्यात येत आहे. यात सहभागी असलेला कमांडर दर्जाचा अधिकारी हा सध्या सुरू असलेल्या पाणबुडीच्या आधुनिकीकरणाच्या अनुषंगाने दोन निवृत्त अधिकाऱ्यांशी चर्चा करत असल्याचे उघड झाले असून त्यात बेकायदेशीर मार्गाने फायदा पोचविण्याच्या बाबीचा स्पष्टपणे उल्लेख करण्यात आला आहे.

नौदलाकडूनही चौकशी

सीबीआयच्या भ्रष्टाचारविरोधी पथकाने हा भ्रष्टाचार उघड केला असून ही माहिती चुकीच्या लोकांच्या हाती तर लागली नाही ना हे देखील पडताळून पाहिले जाते आहे. सीबीआयच्या या चौकशीला नौदलाने देखील पूर्ण पाठिंबा दिला आहे. व्हाइस ॲडमिरलच्या माध्यमातून नौदलानेही याप्रकरणी अंतर्गत चौकशी सुरू केली आहे.