नवी दिल्ली : केंद्र सरकारने रविवारी (ता.१९) ३५ व्हाॅट्सअप ग्रुपवर बंदी घातली आहे. सैन्य भरतीच्या अग्निपथ योजनेबाबत खोट्या बातम्या पसरवल्याबद्दल वरील व्हाॅट्सअप (Whatsapp) ग्रुपवर बंदी घालण्यात आली आहे. सरकार चुकीची माहिती पसरवणाऱ्या आणि हिंसेला उत्तेजन देणाऱ्यांचा शोध घेत आहे. जवळपास १० जणांना खोट्या बातम्या पसरवणे आणि तरुणाईची दिशाभूल केल्याप्रकरणी अटक करण्यात आली आहे. (Centre Bans 35 Whatsapp Groups For Spreading Fake News About Agnipath Scheme)

प्रेस इन्फर्मेशन ब्युरोकडून वस्तुस्थिती तपासली जात असून योजनेसंबंधित माहितीची पडताळणी केली जात आहे. काही दिवसांपूर्वी घोषणा झाल्यानंतर देशातील वेगवेगळ्या भागात अग्निपथ योजनेविरोधात (Agnipath Scheme) हिंसक निदर्शने सुरु झाली आहेत. केंद्र सरकारने मंगळवारी भारतीय तरुणांसाठी संरक्षण दलात नोकरी भरतीसाठी योजनेची घोषणा केली होती.

या अग्निपथ योजनेत साडेसतरा ते २१ वयोगटातील तरुणांना सैन्यदलात भरती होता येते. मात्र आता तरुणांच्या विरोधानंतर वयोमर्यादा दोन वर्षांनी वाढवून ती २३ पर्यंत करण्यात आली आहे.