नवी दिल्ली : दिल्ली सरकारच्या सेवा नियुक्त्यांच्या विषयावर सुप्रीम कोर्टानं नुकताच ऐतिहासिक निर्णय दिला. यामध्ये केंद्रानं दिल्ली सरकारच्या विषयात हस्तक्षेप करण्याचा अधिकार नसल्याचं म्हटलं होतं. पण आता सुप्रीम कोर्टाचा हा आदेश फिरवण्यासाठी केंद्र सरकार कट-कारस्थान रचत असल्याचा दावा दिल्लीचे मुख्यमंत्री अरविंद केजरीवाल यांनी ट्विटद्वारे केला आहे. (Centre doing conspiracy to overturn SC order Arvind Kejriwal made big claim)

केजरीवालांनी ट्विट केलंय की, नायब राज्यपाल सुप्रीम कोर्टाचे आदेश का पाळत नाहीएत? दोन दिवसांपासून सर्व्हिसेस सेक्रेटरींच्या नियुक्तीच्या फाईल्सवर अद्याप सह्या का झालेल्या नाहीत? असा सवालही त्यांनी केला आहे.

असं सांगितलं जातंय की, केंद्र सरकार पुढच्या आठवड्यात अध्यादेश आणून सुप्रीम कोर्टाच्या आदेशाला पलवटवणार आहे का? केंद्र सरकार सुप्रीम कोर्टाचा आदेश पलवटवण्याचं कट-कारस्थान करत आहे का? नायब राज्यपाल या अध्यादेशाची वाट पाहत आहेत का? त्यामुळंच ते फाईलवर सही करत नाहीएत? असे प्रश्न केजरीवाल यांनी विचारले आहेत.

केजरीवालांचे आरोप गंभीर

केजरीवालांनी केंद्र सरकार आणि दिल्लीच्या नायब राज्यपालांवर केलेले आरोप गंभीर आहेत. कारण सुप्रीम कोर्टानं नुकतेत दिल्ली सरकार आणि राज्यपाल यांच्यातील संघर्षावरुन निर्माण झालेल्या एका प्रकरणात निकाल देताना केंद्र सरकारला फटकारलं होतं. तसेच राज्यपालांना राज्य सरकारच्या अधिकारक्षेत्रात घुसखोरी करण्याचा अधिकार नसल्याचं म्हटलं आहे.