देशाचे पहिले गव्हर्नर जनरल आणि काँग्रेसचे ज्येष्ठ नेते सी राजगोपालाचारी (Governor General C Rajagopalachari) यांचे पणतू सीआर केसवन (CR Kesavan) यांनी काँग्रेस पक्षाचा (Congress) राजीनामा दिलाय.

सीआर केसवन यांनी आपला राजीनामा काँग्रेस अध्यक्ष मल्लिकार्जुन खर्गे यांना पाठवला आहे. राजीनामा पत्रात केसवन यांनी लिहिलंय, गेल्या दोन दशकांपासून मी पक्षासाठी काम करत आहे. परंतु, माझ्याकडं वारंवार दुर्लक्ष केलं गेलं आहे. यामुळंच मी राष्ट्रीय स्तरावरील पक्षाच्या कार्यक्रमाची जबाबदारी घेतली नाही किंवा भारत जोडो यात्रेतही भाग घेतला नाही, असं केशवन यांनी सांगितलं.

आता नव्या वाटेवर जाण्याची वेळ आलीये. म्हणूनच, मी पक्षाच्या प्राथमिक सदस्यत्वाचा राजीनामा देत असल्याचंही केशवन यांनी स्पष्ट केलं. केशवन यांनी तामिळनाडू काँग्रेस कमिटी चॅरिटेबल ट्रस्टच्या विश्वस्तांकडंही राजीनामा पाठवला आहे. केशवन यांनी सध्या इतर कोणत्याही पक्षात प्रवेश नाकारला आहे. सीआर केसवन यांनी 2001 मध्ये काँग्रेसमध्ये प्रवेश केला होता. यादरम्यान त्यांनी राजीव गांधी राष्ट्रीय युवा विकास संस्थेचं उपाध्यक्षपदही भूषवलं.