बेळगाव : लोकसभा निवडणूक (Belgaum Loksabha Election) जशी जवळ येत आहे, तशी नेत्यांची राजकीय वक्तव्येही समोर येत आहेत. आता काँग्रेस (Congress) नेते सतीश जारकीहोळी यांनीही लोकसभेबाबत महत्वाचं विधान केलंय.

हायकमांडनं मला लोकसभा निवडणूक लढवण्यास सांगितलेलं नाही. मात्र, अधिकाधिक जागा जिंकण्यासाठी सर्वांनी तयारी करण्याच्या सूचना दिल्याचे जिल्हा पालकमंत्री जारकीहोळी (Congress leader Satish Jarkiholi) यांनी सांगितलं.

कुमार गंधर्व रंगमंदिर आवारात पत्रकारांशी बोलताना त्यांनी आगामी लोकसभा निवडणुकीत राज्यातून जास्तीत जास्त जागा जिंकून दाखवा, अशा सूचना नुकत्याच दिल्लीत झालेल्या बैठकीत देण्यात आल्या आहेत. आपल्या जिल्ह्यातील दोन्ही मतदारसंघात काँग्रेसला विजयी करणं हे आपलं कर्तव्य आहे.

बंगळुरमध्ये उमेदवार निवडीबाबत आधीच चर्चा झाली आहे. दुसऱ्यांदा लवकरात लवकर बेळगावात बैठक घेऊन चर्चा करू. हायकमांडनं मला लोकसभा निवडणूक लढवण्याची सूचना केलेली नाही. इच्छुक उमेदवारांचा शोध घ्यावा लागेल. विद्यमान आणि माजी मंत्र्यांनी निवडणूक लढवावी, असं कुठंही म्हटलेलं नाही, असं त्यांनी सांगितलं.

विजयाची शक्यता असलेल्या उमेदवाराला संधी देऊ. विधानसभा निवडणुकीच्या धर्तीवर काँग्रेस लोकसभा निवडणुकीला सामोरे जाणार आहे. मात्र, या निवडणुकीत अधिक जबाबदारी असल्याचे त्यांनी सांगितले.