बंगळुरू : कर्नाटकातील उडपीमध्ये गेल्या अनेक दिवसांपासून हिजाबवरून (Karnataka Hijab Row) वातावरण तापलं आहे. हिजाब घातलेल्या मुलींना शाळेत प्रवेश नाकारला आहे. खुद्द महाविद्यालयाचे प्राचार्य प्रवेशद्वारावर उभे राहून मुलींना घरचा रस्ता दाखवत आहेत. त्याविरोधात आता काँग्रेसचे (Congress) नेते चांगलेच आक्रमक झाले असून आज त्यांनी आंदोलन केले.

काँग्रेस आमदार कनिझ फातिमा (Congress MLA Kaneez Fatima) आणि त्यांच्या समर्थकांनी हिजाबला विरोध करणाऱ्यांचा निषेध करण्यासाठी आंदोलन केले. मुलींना परीक्षेच्या २ महिन्याआधी शाळांमध्ये प्रवेश नाकारला जात आहे. मुलींवर अत्याचार होत आहेत. यालाच विरोध करण्यासाठी सर्व जाती-धर्माचे लोक कलबुर्गी येथील जिल्हाधिकारी कार्यालयात जमलो असल्याचे फातिमा यांनी सांगितले.

आतापर्यंत सर्वांनी हिजाब घातला आहे. आता खूप उशिर झाला आहे. ते आम्हाला अचानक का थांबवत आहेत? बुरखा कोणासाही काही नवीन नाही. गणवेशाच्या रंगाचा हिजाब असावा यासाठी आम्ही हिजाबच्या रंगात बदल करण्यास तयार आहोत. पण, आम्ही तो सोडू शकत नाही. मी विधानसभेतही हिजाब घालते. जमल्यास ते मला थांबवू शकतात. पण, त्यांनी तसं केलं नाही. मग शाळेत हिजाबला विरोध का? असा सवाल फातिमा यांनी उपस्थित केला. याबाबत मुख्यमंत्र्यांना निवेदन देऊन उडपीमध्ये आंदोलन करणार असल्याचे त्या म्हणाल्या.

नेमका प्रकार काय? -

कर्नाटकातील उडपी येथे काही दिवसांपासून हिजाबला विरोध होत आहे. शाळेत सर्वांनी एकाच गणवेशात यावं, असा आदेश शिक्षणमंत्र्यांनी काढला आहे. त्यामुळे हिजाब परिधान करून आलेल्या मुस्लीम विद्यार्थिंनींना महाविद्यालयात प्रवेश नाकारला जात आहे. तसेच मुस्लीम विद्यार्थिनी हिजाब घालून आल्या तर हिंदू विद्यार्थिनी भगवा दुपट्टा घेऊन येतील, असा आक्रमक पवित्रा हिंदू संघटनांनी घेतला आहे. त्यामुळे यावरून राजकारण चांगलेच तापले आहे.