नवी दिल्ली : कोवोव्हॅक्स लसीला (Covovax vaccine) जागतीक आरोग्य संघटनेनं (WHO) भारतात १२ ते १८ वर्षे वयोगटातील मुलांना आपत्कालिन वापरण्यासाठी परवानगी दिली आहे. दरम्यान, ही लस कोरोनावर ९० टक्के कार्यक्षम असल्याचं चाचण्यांमधून स्पष्ट झालं आहे. भारतातील कोविशिल्ड (Covishield) लसीपेक्षा कोवोव्हॅक्स खूपच चांगली लस असल्याचं सरकारी पॅनलनं म्हटलं आहे. त्यामुळं भारताचे टॉपचे सरकारी संशोधक डॉ. अनुराग अग्रवाल यांनी ओमिक्रॉनच्या वाढत्या संसर्गाच्या पार्श्वभूमीवर कोवोव्हॅक्सची बूस्टर डोससाठी शिफारस केली आहे. (Covovax is better than Covishield the government is recommended for booster dose)

सरकारच्या जिनोम सिक्वेंसिंग मॉनिटरिंग एजन्सींपैकी (INSACOG) एक संचालक म्हणाले, "कोवोव्हॅक्स खूपच मजबूत रोगप्रतिकारशक्ती प्रदान करते तसेच ती चांगली सुरक्षा देणारी लस आहे."

कोवोव्हॅक्स ही नोवाव्हॅक्स आयएनसी (Novavax Inc) कंपनीनं तयार केलेल्या कोरोना प्रतिबंधक लसीची भारतीय आवृत्ती आहे. भारतातील सीरम इन्स्टिट्युट ऑफ इंडिया या फार्मा कंपनीला या लसीच्या उत्पादनाचा परवाना मिळाला आहे. ही एक पुनर्संयोजन प्रोटीन लस आहे जी स्पाइक प्रोटीन्स वापरून शरीराला नव्या कोरोना व्हेरियंट विरूद्ध प्रतिकारशक्ती कशी विकसित करावी हे शिकवते.

अग्रवाल म्हणाले, कोवोव्हॅक्स लस बूस्टर डोस म्हणून कोविशिल्डपेक्षा खूपच कार्यक्षम आहे. तथापि, त्यांनी स्पष्ट केलं की, ओमिक्रॉनविरूद्ध नोव्हॉवॅक्स किती प्रतिकार प्रदान करते यावर पुढील क्लिनिकल अभ्यास गरजेचे ठरणार आहेत. आता तर WHO चं आपत्कालीन वापरासाठी दिलेली मंजुरी ही भारतासाठी चांगली बातमी आहे. त्यामुळं आता सरकारनं कोवोव्हॅक्सचा बुस्टर डोस म्हणून वापर करण्यासाठी खूप वेळ वायाला घालवू नये.