बेळगाव : आमदार लक्ष्मण सवदी (Laxman Savadi) यांना संभाव्य मंत्रिपद मिळण्याची दाट शक्यता असताना अखेरच्या क्षणी त्यांचे नाव मागे पडले. त्या पार्श्वभूमीवर सवदी यांची भेट घेऊन नाराजी दूर करण्याबाबत उपमुख्यमंत्री डी. के. शिवकुमार (D. K. Shivakumar) यांनी प्रयत्न केले.

दरम्यान, शिवकुमार आणि सवदी यांच्यात बेळगावमध्ये सुमारे अर्धा तास चर्चा झाली. यावेळी शिवकुमार यांनी आमदार सवदींना योग्य स्थान देण्याची ग्वाही दिली.

विधानसभा निवडणुकीत उमेदवारी डावलण्यात आल्यामुळे भाजपचा राजीनामा देऊन काँग्रेस पक्षात दाखल झालेले सवदी यांनी अथणी मतदारसंघातून एकहाती विजय मिळविला. शिवाय त्यांनी कुडची व कागवाडमधील काँग्रेस उमेदवारांना निवडून आणण्यात महत्त्वाची भूमिका बजावली.

त्यामुळे संभाव्य मंत्रिपदाच्या यादीत सतीश जारकीहोळी, लक्ष्मी हेब्बाळकर, प्रकाश हुक्केरी यांच्यासह लक्ष्मण सवदी यांचे नाव आघाडीवर होते. मात्र, मुख्यमंत्री सिद्धरामय्या यांच्या मंत्रिमंडळात जारकीहोळी, हेब्बाळकर यांना संधी मिळाली. त्यामुळे हुक्केरींसह सवदी नाराज असल्याची चर्चा होती.

त्यापैकी सवदी यांची शिवकुमार यांनी तातडीने भेट घेऊन चर्चा केली. त्यानंतर त्यांनी माजी मुख्यमंत्री जगदीश शेट्टर यांचीही भेट घेणार असल्याचे सांगितले. विधानसभेला अन्य पक्षांतील नेत्यांनी काँग्रेसमधून निवडणूक लढविल्यामुळे पक्षाची ताकद वाढली. निवडणुकीत काही जणांनी विजय मिळविला आहे, तर काहींचा पराभव झाला.

तरीही पक्षातील महत्त्वाचे नेते असल्यामुळे प्रत्यक्ष भेटी घेण्यासाठी आल्याचे उपमुख्यमंत्री शिवकुमार यांनी शासकीय विश्रामगृहात बुधवारी पत्रकारांशी बोलताना सांगितले. शिवकुमार म्हणाले, ‘‘विधानसभा निवडणुकीच्या तोंडावर भाजप आणि धजदमधील अनेकांनी काँग्रेसमध्ये प्रवेश करत पक्षाची ताकद वाढविली. पक्ष संघटना व इतरांच्या सहकार्यामुळे बहुमत मिळाले, पण मंत्रिमंडळ विस्तार, शपथविधी आणि बैठकांमुळे काही नेत्यांशी बोलणे झाले नाही.

त्यांची भेटही होऊ शकली नाही. त्यामुळे तातडीने दौरा जाहीर करत भेट घेतली.’’ यावेळी सार्वजनिक बांधकाम मंत्री सतीश जारकीहोळी, महिला व बालकल्याण मंत्री लक्ष्मी हेब्बाळकर, आमदार बाबासाहेब पाटील, महेंद्र तम्मनवर, विश्वास वैद्य, चन्नराज हट्टीहोळी, आसिफ सेठ उपस्थित होते.