नवी दिल्लीः ईडीने शनिवारी दिल्लीचे मुख्यमंत्री अरविंद केजरीवाल यांच्या अंतरिम जामिनाचा कालावधी वाढवण्याच्या याचिकेला विरोध केला. ईडीने कोर्टात म्हटलं की, आम आदमी पक्षाचे संयोजक अरविंद केजरीवाल यांनी त्यांच्या प्रकृतीबाबत चुकीचं स्टेटमेंट दिलं आहे. जेलमध्ये असताना त्यांचं वजन एक किलोने वाढल्याचा दावा केला आहे.

अरविंद केजरीवालांनी मात्र जेलमध्ये असताना ६ किलो वजन घटल्याचं म्हटलं आहे. ईडीने विशेष न्यायाधीश कावेरी बावेजा यांच्यासमोर दावा केला की, केजरीवालांनी तथ्य लपवून आरोग्यासंबंधी चुकीची माहिती दिली. त्यांनी मेडिकल तपास करण्याऐवजी देशभर दौरा केला.

ईडीकडून सॉलिसिटर जनरल तुषार मेहता यांनी यांनी कोर्टात सांगितलं की, अरविंद केजरीवाल यांनी शुक्रवारी पत्रकार परिषदेत दिशाभूल करत दोन जूनला आत्मसमर्पण करणार असल्याचं म्हटलं.

प्रकृतीच्या कारणास्तव अंतरिम जामिनाचा कालावधी एक आठवडा वाढवण्याची मागणी अरविंद केजरीवाल यांच्यावतीने करण्यात आलेली आहे. कोर्टाने ५ जूनपर्यंत आपला निर्णय सुरक्षित ठेवला आहे.