बंगळूर : रामनगर जिल्ह्यातील गोल्लरदोड्डी येथे मालवाहू वाहनाने शाळकरी मुलांना (School Children) धडक दिल्याने झालेल्या अपघातातील मृतांची संख्या चार झाली. याप्रकरणी गंभीर जखमी झालेल्या आणखी एका मुलीचा रविवारी (ता. २०) रात्री मृत्यू झाल्याने संतप्त झालेल्या ग्रामस्थांनी मुलीचा मृतदेह रस्त्याच्या मधोमध ठेवून ठिय्या आंदोलन केले.

ही मुले शिकवणी संपवून घरी जात असताना मालगाडीची धडक बसली. आणखी तीन मुले गंभीर जखमी असून, त्यांच्यावर रुग्णालयात उपचार सुरू आहेत. हा अपघात बुधवारी झाला होता. दोन मुलांचा जागीच मृत्यू झाला होता. एक मुलगा गंभीर जखमी होता, त्याचा तीन दिवसांनी मृत्यू झाला. त्यानंतर काल ७ वर्षीय ज्ञानवी हिचा मृत्यू झाला.

तिच्यावर बंगळूर येथील इंदिरा गांधी इन्स्टिट्यूट ऑफ चेस्ट डिसीज हॉस्पिटलमध्ये उपचार सुरू होते. मुलीचा मृतदेह रामनगर-मागडी रस्त्यावर ठेवून कुटुंबीय, नातेवाईक व स्थानिकांनी निषेध केला. चार मुलांचा बळी घेणाऱ्या वाहनचालकाला कठोर शिक्षा व्हावी, अशी मागणी त्यांनी केली. अधिकाऱ्यांनी घटनास्थळी येऊन गाऱ्हाणे ऐकून घेतले.

मृत मुलांच्या कुटुंबीयांना आवश्यक नुकसानभरपाई द्यावी, अशी मागणी आंदोलकांनी केली. माजी मुख्यमंत्री आणि धजद नेते एच. डी. कुमारस्वामी यांनी या अपघाताबद्दल शोक व्यक्त केला आणि राज्य सरकारला अशा दुर्घटनांना कारणीभूत असलेल्या बेदरकारपणे वाहन चालविण्याविरुद्ध कारवाई करण्याची आणि शाळकरी मुलांची सुरक्षा सुनिश्चित करण्याची विनंती केली.